VẼNEGRE
D bãng ‘Babilon Kãsengã’ sẽn yaa a soaba
WILGR sebrã bilgda yɛl wʋsg sẽn yaa makr buudu. (Wilgri 1:1) Wala makre, a gomda pʋg-yoodr yelle, tɩ yʋʋr sẽn yaa “Babilon kãsenga” gʋls a rĩirẽ wã. B yeelame tɩ pʋg-kãngã zĩi ‘neb la kʋʋng toɛy-toɛy’ zutu. (Wilgri 17:1, 5, 15) Sẽn mik tɩ pag sɩd-sɩd pa tõe n maan woto wã, a segd n makda bũmbu. Babilon Kãsengã sẽn yaa pʋg-yoodrã makda bõe?
Wilgr 17:18 pʋgẽ, b bilgda pʋg-kãngã wala “tẽng kãsenga sẽn so dũniyã rĩm dãmba.” Gomd ning sẽn yaa ‘tẽnga’ wilgdame tɩ yaa neb sẽn sigl sulli. “Tẽng-kãsenga” sẽn so “dũniyã rĩm dãmba” yĩnga, pag ning yʋʋr sẽn yaa Babilon Kãsengã segd n yaa siglg sẽn be tẽnsã fãa pʋsẽ n tar pãnga. B tõe n yeelame t’a yaa soolem sẽn be dũniyã gill zugu. Soolem bʋg buudu? Tũudum soolem. Ges-y verse rãmb a taab Wilgr sebrã pʋgẽ sẽn kɩt tɩ d yet woto wã.
Soolem tõe n yɩɩ politiki, leebg bɩ tũudum soolem. Pag ning yʋʋr sẽn yaa Babilon Kãsengã pa politik soolem ye, bala Wẽnnaam Gomdã yetame tɩ “dũniyã rĩm dãmb” bɩ dũni kãngã politik nanambsã “maana yoob” ne-a. Yoobã võor dat n yeelame t’a maanda kaool ne dũni kãngã nanambsã, la rẽ n kɩt tɩ b boond-a tɩ ‘pʋg-yood kãsengã.’—Wilgri 17:1, 2; Zak 4:4.
Babilon Kãsengã pa tõe n yɩ leebg soolem ye, bala “dũniyã toandba” sẽn makd lɛɛbdbã na n yãb-a-la a sãoongã wakate. B wilgame tɩ rĩm dãmbã la toandbã ‘yasa yɩɩg’ n get Babilon Kãsengã. (Wilgri 18:3, 9, 10, 15-17) Rẽ n kɩt tɩ d tõe n yeel tɩ Babilon Kãsengã pa politik bɩ leebg soolem ye, la a yaa tũudum soolem.
B sẽn yeel tɩ Babilon Kãsengã ‘bagrã’ belga tẽnsã fãa wã leb n sɩd wilgdame t’a yaa tũudum. (Wilgri 18:23) Bagr la tɩt maanegã sɩd yaa tũudum yɛla, la b yita zĩn dãmbã nengẽ. Dẽnd pa lingr la Biiblã sẽn boond Babilon Kãsengã tɩ ‘zĩn dãmb yirã’ ye. (Wilgri 18:2; Tõodo 18:10-12) B leb n yeelame tɩ soolem kãng kɩɩsda sɩd tũudmã, n namsd “no-rɛɛsdba” la “Wẽnnaam nebã.” (Wilgri 18:24) Sɩda, Babilon Kãsengã kisa tũudum hakɩkã wʋsg hali tɩ kɩt t’a namsd “a Zezi kaset dãmba” wʋsgo, la a kʋʋd-b menga. (Wilgri 17:6) Woto yĩnga, yaa vẽeneg tɩ pʋg-kãngã b sẽn pʋd tɩ Babilon Kãsengã makda dũni gill ziri tũudmã fãa sẽn naag taaba, sẽn dat n yeel tɩ tũudum nins fãa sẽn kɩɩsd Wẽnnaam a Zeova wã.
