IPAN pilamochtsi Apocalipsis o Revelación, motekiuia miak tlajtoli tlen san kiixnextia sekinok tlamantli (Apocalipsis 1:1). Kiijtoua se siuatl momekatia uan ikuaixpa ijkuilijtok tlajtoli “Ueyi Babilonia”. Uan kiijtoua moseuia ipan “miak tlakamej [...] uan tlen itstokej ipan nochi tlaltinij” (Apocalipsis 17:1, 5, 15). Ni tlamantli amo ueliskia kichiuas se siuatl, yeka “Ueyi Babilonia” san kiixnextia seyok tlamantli. ¿Tlake kiixnextia?

 Ipan Apocalipsis 17:18 kiijtoua tlake kiijtosneki “nopa ueyi altepetl tlen kinnauatia nochi tlanauatianij ipan Tlaltipaktli”. Se “altepetl” kiijtosneki se keskij maseualmej katli tekitij sansejko. Ni texto kiijtoua “nopa ueyi altepetl” kinnauatia “nochi tlanauatianij ipan Tlaltipaktli”. Uajka, nopa Ueyi Babilonia yaya tlanauatia ipan nochi Tlaltipaktli. Uan, ¿ajkia kinixnextia? Nochi religiones tlen amo melauak. Ma tikitakaj ipan Apocalipsis se keski textos tlen ya nopa kinextia.

Ipan Tlaltipaktli uelis tlanauatisej políticos, tlanamakanij o religiones. Nopa Ueyi Babilonia amo kinixnextia políticos, pampa Biblia kiijtoua “tlanauatianij ipan Tlaltipaktli [o políticos] momekatijkej iuaya”. Kema kiijtoua momekatijtokej iuaya kiijtosneki tekiti sansejko ininuaya tlanauatianij, uan ni kichijtok pampa kineki yaya kipias miak tlanauatili uan kiampa uelis kinyakanas. Yeka Ueyi Babilonia kitokaxtiaj “se fiero momekatijkasiuatl” (Apocalipsis 17:1, 2; Santiago 4:4).

Biblia kiijtoua kema kitsontlamiltisej ni siuatl, moyolkokosej “tlanamakanij tlen kampa ueli ipan Tlaltipaktli”. Yeka nopa Ueyi Babilonia amo kinixnextia nopa tlanamakanij, uan nojkia kiijtoua nopa tlanauatianij uan nopa tlanamakanij san “kiuejkatlachilisej” (Apocalipsis 18:3, 9, 10, 15-17). Uajka, Ueyi Babilonia amo kinixnextia políticos yon tlanamakanij, kinixnextia religiones katli amo melauak.

Biblia kiijtoua nopa Ueyi Babilonia tekajkayaua ika ‘itetlajchiuil’. Ni kinextia nopa Ueyi Babilonia kinixnextia religiones katli amo melauak (Apocalipsis 18:23). Nopa amo kuali ajakamej kichiuaj ma onka tlen ika tetlajchiuiaj, yeka Biblia kiijtoua nopa Ueyi Babilonia “ininchaj ajakamej tlen fierojtikej” (Apocalipsis 18:2; Deuteronomio 18:10-12). Ni Ueyi Babilonia tlauel kikualankaita nopa religión katli melauak, yeka kintlatsakuiltia toTeotsij “iteokamanalojkauaj” uan “itlatsejtseloltijkatlakauaj” (Apocalipsis 18:24). Uan nojkia kintlaijiyouiltia uan kinmiktia ‘katli kiniljuiaj sekinok tlen Jesús’ (Apocalipsis 17:6). Uajka, Ueyi Babilonia kinixnextia nochi religiones katli amo melauak tlen onka ipan nochi Tlaltipaktli uan tlen kiijixnamikij Jehová.