ISITHASISELO
Ukufumana Bona Khuyini “IBhabhiloni Yodumo”
INCWADI yeSambulo inamezwi okungafuze siwathathe njengombana anjalo. Isibonelo, ikhuluma ngomfazi onebizo elithi “iBhabhiloni Yodumo” elitlolwe epandlakhe. Umfazi lo uhlathululwe njengohlezi phezu ‘kweenqubuthu zabantu, neentjhaba.’ (ISambulo 17:1, 5, 15) Njengombana kungekho umfazi wamambala ongenza intwele, iBhabhiloni Yodumo ingokomfanekiso. Ngalokho-ke ijameleni ingwadlakazi engokomfanekiso le?
KuSambulo 17:18, umfazi ongokomfanekiso lo uhlathululwe bona “umumuzi wedumo oguqelwa makhosi wephasi uwabuse.” Ibizo elithi ‘umuzi’ litjho ihlangano yesiqhema sabantu ehleliweko. Njengombana ‘umuzi wedumo’ lo ulawula phezu ‘kwamakhosi wephasi,’ umfazi obizwa bona yiBhabhiloni Yedumo uyihlangano enomthelela ephasini loke. Ingabizwa ngokufaneleko bona mbuso wephasi. Mbuso onjani loyo? Mbuso wekolo. Tjheja bona ezinye iindima zencwadi yeSambulo zisenze njani bona sifike esiphethwenesi.
Umbuso ungaba ngezombanganarha, zerhwebo, namtjhana zekolo. Umfazi obizwa bona yiBhabhiloni Yedumo akasiwo umbuso wezombanganarha ngombana iLizwi lakaZimu lithi “amakhosi wephasi,” namtjhana iinqhema zephasi zezombanganarha, “agila nayo imikhuba yobungwadla.” Ubufebe bakhe buqaliswe emvumelwaneni azenza nababusi bephaseli begodu ihlathulula nokobana kubayini abizwa bona “ingwadlakazi.”—ISambulo 17:1, 2; KaJakobosi 4:4.
IBhabhiloni Yedumo ayisiwo umbuso wezerhwebo ngombana “nabarhwebi bephasi,” abajamele iinqhema zerhwebo, bazoyililela ngesikhathi sokutjhatjalaliswa kwayo. Eqinisweni, kokubili ababusi nabarhwebi bahlathululwa njengabazakuqala iBhabhiloni Yedumo ‘bajamele kudana.’ (ISambulo 18:3, 9, 10, 15-17) Ngalokho, kuyazwakala ukuphetha ngokobana iBhabhiloni Yedumo ayisiwo umbuso wezombanganarha namtjhana wezerhwebo, kodwana mbuso wekolo.
Bona iBhabhiloni Yedumo yikolo, godu kufakazelwa kukobana idukisa zoke iintjhaba “ngobuloyi” bayo. (ISambulo 18:23) Njengombana zoke iinhlobo zeenkolo nemimoya ziphefumulelwe mademoni, akurari bona iBhayibhili ibiza iBhabhiloni Yedumo bona “seliyindawo yokuhlala imimoya emimbi.” (ISambulo 18:2; Duteronomi 18:10-12) Umbuso lo godu uhlathululwa njengophikisa ikolo yeqiniso ngelunya, utlhorise ‘abaporofidi,’ ‘nabantu bakaZimu.’ (ISambulo 18:24) Eqinisweni, iBhabhiloni Yedumo inehloyo ekulu ngekolo yeqiniso kangangobana ngelunya itlhorisa begodu ibulala ‘abofakazi bakaJesu.’ (ISambulo 17:6) Ngikho, umfazi lo obizwa bona yiBhabhiloni Yedumo ngokukhanyako ajamele umbuso wephasi wekolo yamala, okuhlanganisa zoke iinkolo eziphikisana noJehova uZimu.
