EDWƐKƐ bie mɔ wɔ Yekile buluku ne anu mɔɔ ɔwɔ kɛ yɛte ɔ bo wɔ sɛkɛlɛneɛ adenle zo a. Kɛ neazo la, ɔka raalɛ bie, tuutuunli, mɔɔ bɛhɛlɛ “Babelɔn mɔɔ ɛlie duma [“Babelɔn Kpole ne,” NW] ɔ nwoma azo la anwo edwɛkɛ. Raalɛ ɛhye de azule bie mɔɔ gyi ɛkɛ ne maa “maanle maanle, menli, aneɛ ngakyile, yɛɛ mbusua kɔsɔɔti” la anloa. (Yekile 17:1, 5, 15) Bɛvale edwɛkɛ ɛhye mɔɔ wɔ ɛke la bɛlile gyima wɔ sɛkɛlɛneɛ adenle zo, yemɔti Babelɔn Kpole ne ɛnrɛhola ɛnrɛyɛ sonla. Ɛnee duzu a sɛkɛlɛneɛ adenle zo tuutuunli ne kile a?

Bɛha sɛkɛlɛneɛ adenle zo raalɛ ko ye ala anwo edwɛkɛ wɔ Yekile 17:18 kɛ “Suakpole ne mɔɔ sie arelemgbunli mɔɔ wɔ azɛlɛ  ye azo la amuala.” Edwɛkɛkpɔkɛ “suakpole” ne kile menli ekpunli. Ɔluakɛ “suakpole” ɛhye sie “arelemgbunli mɔɔ wɔ azɛlɛ ye azo” la ati, raalɛ ne mɔɔ bɛfɛlɛ ye Babelɔn Kpole ne la bayɛ fane bie mɔɔ lɛ tumi wɔ ewiade amuala a. Bɛbahola bɛavɛlɛ ye ewiade maanle. Duzu maanle ɔ? Ɔle ɛzonlenlɛ nu maanle. Yɛ kɛzi edwɛkɛ bie mɔ mɔɔ wɔ Yekile buluku ne anu la maa yɛkola yɛka ye zɔ la nzonlɛ.

Maanle bahola ayɛ maanyɛlɛ, gualilɛ, anzɛɛ ɛzonlenlɛ. Raalɛ ne mɔɔ bɛfɛlɛ ye Babelɔn Kpole ne la ɛnle maanyɛlɛ nu maanle ɔluakɛ Nyamenle Edwɛkɛ ne ka ye kɛ “ewiade arelemgbunli,” anzɛɛ ewiade maanyɛlɛ eku ne mɔ, nee ye “bɔle adwɔmane.” Ye adwɔmanebɔlɛ ne kile ɔ nwo mɔɔ yeva yehɔbeta ewiade arelemgbunli ne mɔ anwo la, na ɛhye kile deɛ mɔɔ ɔti bɛfɛlɛ ye “tuutuunli ne mɔɔ ɛlie duma” la anu.—Yekile 17:1, 2; Gyemise 4:4.

Babelɔn Kpole ne ɛnrɛhola ɛnrɛyɛ gualilɛ nu maanle ɔluakɛ “ewiade gualilɛma” bazu ye wɔ mekɛ mɔɔ bɛlɛsɛkye ye la. Nɔhalɛ nu, bɛha arelemgbunli ne mɔ nee gualilɛma ne anwo edwɛkɛ kɛ bɛgyinlanle “amozi” na bɛnleanle Babelɔn Kpole ne. (Yekile 18:3, 9, 10, 15-17) Ɛhye ati, yɛkola yɛsi ye pi kɛ Babelɔn Kpole ne ɛnle maanyɛlɛ anzɛɛ gualilɛ nu maanle, emomu ɔle ɛzonlenlɛ nu maanle.

Ɛhanlɛ mɔɔ Baebolo ne ka kɛ Babelɔn Kpole ne dua “ngonyia” anzɛɛ sunsum evinli nyɛleɛ zo bɛlɛbɛla maanle maanle kɔsɔɔti la si zolɛ bieko kɛ ɔle ɛzonlenlɛ nu debie. (Yekile 18:23) Kɛmɔ sunsum evinli nyɛleɛ biala le ɛzonlenlɛ nu debie yɛɛ sunsum evinli a zua ɔ nzi la ati, ɔnyɛ azibɛnwo kɛ Baebolo ne ka kɛ Babelɔn Kpole ne le ɛleka mɔɔ “sunsum ɛtane nee mbɔnsam a wɔ” a. (Yekile 18:2; Mɛla ne 18:10-12) Eza bɛha maanle ne anwo edwɛkɛ kɛ ɔdwazo ɔtia nɔhalɛ ɛzonlenlɛ, ɔyɛ “ngapezoma,” yɛɛ “nwuanzanwuanzama” ne mɔ kpɔdekpɔde. (Yekile 18:24, NW) Nɔhalɛ nu, Babelɔn Kpole ne kpɔ nɔhalɛ ɛzonlenlɛ kpole kpalɛ yemɔti ɔyɛ ‘Gyisɛse alasevolɛ’ ne mɔ kpɔdekpɔde na ɔku bɛ bɔbɔ. (Yekile 17:6) Ɛhye ati, raalɛ ɛhye mɔɔ bɛfɛlɛ ye Babelɔn Kpole ne la gyi ɛkɛ ne maa ewiade amuala adalɛ ɛzonlenlɛ ne, mɔɔ ɛzonlenlɛ mɔɔ dwazotia Gyihova Nyamenle la amuala boka nwolɛ la.