WALA ray nabasa ed libron Apocalipsis ya aliwan literal so labay ton ibaga. (Apocalipsis 1:1) Singa bilang, nabasa ditan so sakey ya biin akasulat ed moling to so ngaran ya “Makapanyarin Babilonia.” Sayan bii et akayurong ed “grupo na totoo tan nasyon.” (Apocalipsis 17:1, 5, 15) Lapud anggapoy literal a bii ya makagawad satan, seguradon simboliko so Makapanyarin Babilonia. Antoy irerepresenta na sayan simbolikon imoral ya bii?

Imbagad Apocalipsis 17:18 ya satan a simbolikon bii et sakey ya “baleg a syudad a walaan na sakey a panarian a manuuley ed saray arari na dalin.” Say salitan “syudad” et ontutukoy ed sakey ya organisasyon na totoo. Lapud kokontrolen na sayan ‘baleg a  syudad iray arari na dalin,’ say bii a tinawag ya Makapanyarin Babilonia et seguradon sakey a maimpluensyan organisasyon ya sakop toy interon mundo. Sayan organisasyon et grupo na saray relihyon, aliwan organisasyon na politika odino komersyo. Napruebaan tayo itan diad saray pigaran teksto ed libron Apocalipsis.

Say bii a tinawag ya Makapanyarin Babilonia et aliwan organisasyon na politika lapud ibabaga na Salitay Dios ya “saray arari na dalin,” odino saray politiko ed mundo et akirelasyon ed sikato. Imoral ya akirelasyon so bii diad impi-alyansa to ed saray manuley ed sayan dalin tan ginawa toy anggaay nayarian to pian nakontrol tan naimpluensyaan to ra. Atan so rason no akin ya sikatoy tinawag ya “maimpluensyan imoral a bii.”​—Apocalipsis 17:1, 2; Santiago 4:4.

Say Makapanyarin Babilonia et aliwa met ya organisasyon na komersyo lapud “saray negosyante ed dalin,” ya mangirerepresenta ed komersyo ed sayan mundo, et manermen no naderal iyan bii. Diad tua, nabasa ya saray arari tan negosyante et ‘akaalagey ed arawi’ tan sankanengneng day Makapanyarin Babilonia. (Apocalipsis 18:3, 9, 10, 15-17) Duga sirin ya say Makapanyarin Babilonia et aliwan organisasyon na politika odino komersyo, noagta organisasyon na nanduruman relihyon.

Lalon apruebaan ya say Makapanyarin Babilonia et organisasyon na nanduruman relihyon lapud papalikdoen o ibabalang na satan so amin a nasyon panamegley na “espiritismo.” (Apocalipsis 18:23) Lapud amin a klase na espiritismo et walay koneksion tod relihyon tan nanlapud saray demonyo, agtayo la pankelawan no akin a tinawag na Biblia so Makapanyarin Babilonia ya “ayaman na saray demonyo.” (Apocalipsis 18:2; Deuteronomio 18:10-12) Nabasa met ya say Makapanyarin Babilonia et onkokontrad tuan relihyon, ya papairapen to iray “propeta” tan “saray masanto.” (Apocalipsis 18:24) Diad tua et kabkabusol toy tuan relihyon, tan marukruksa ni ingen ya mamapairap tan mamapatey ed “saray tasi nen Jesus.” (Apocalipsis 17:6) Kanian malinew ya sayan bii ya tinawag a Makapanyarin Babilonia et mangirerepresenta ed amin a palson relihyon ed interon mundo, kaibay amin a relihyon ya onkokontra ed si Jehova a Dios.