E BUKI di Revelacion ta contene expresionnan cu nos no mester compronde literalmente. (Revelacion 1:1, NW) Por ehempel, e ta menciona un mohe cu tin e nomber ‘Babilonia e Grandi’ skirbi riba su frenta. Bijbel ta bisa cu e mohe aki ta sinta riba “multitudnan y nacionnan.” (Revelacion 17:1, 5, 15) Ya cu ningun mohe literal por haci esaki, Babilonia e Grandi mester ta simbolico. Pues, kico e prostituta simbolico aki ta representa?

Revelacion 17:18 ta describi e mesun mohe simbolico aki como “e gran stad cu ta reina riba e reinan di tera.” E palabra “stad” ta indica un grupo di hende organisa. Siendo cu e “gran stad” tin control riba “e reinan di tera”, e mohe cu  yama Babilonia e Grandi mester ta un organisacion di hopi influencia y di alcanse internacional. Por yam’e debidamente un imperio mundial. Ki clase di imperio? Un imperio religioso. Tuma nota con algun texto relaciona cu ne den e buki di Revelacion ta hiba nos na e conclusion aki.

Un imperio por ta politico, comercial of religioso. E mohe cu yama Babilonia e Grandi no ta un imperio politico pasobra e Palabra di Dios ta declara cu “e reinan di tera”, esta, e elementonan politico di e mundo aki, “a comete actonan di inmoralidad” cu ne. Su actonan di inmoralidad ta referi na e aliansanan cu el a sera cu gobernantenan di e mundo aki y esei ta splica dicon Bijbel ta yam’e “e gran prostituta.”—Revelacion 17:1, 2; Santiago 4:4.

Babilonia e Grandi no por ta un imperio comercial pasobra e “comerciantenan di tera”, cu ta representa e elementonan comercial, lo yora na momento di su destruccion. De echo, Revelacion ta describi cu tanto e reinan como e comerciantenan lo para wak Babilonia e Grandi “na un distancia.” (Revelacion 18:3, 9, 10, 15-17) Pesei, ta rasonabel pa conclui cu Babilonia e Grandi no ta un imperio politico ni comercial, sino un imperio religioso.

E identidad religioso di Babilonia e Grandi ta keda confirma mas aleu door di e declaracion cu e ta gaña tur e nacionnan pa medio di su “bruheria.” (Revelacion 18:23) Siendo cu tur forma di spiritismo ta un practica religioso y inspira pa demoño, no ta un sorpresa cu Bijbel ta yama Babilonia e Grandi “un luga di biba pa demoñonan.” (Revelacion 18:2; Deuteronomio 18:10-12) E imperio aki ta wordo describi tambe como un imperio cu activamente ta opone religion berdadero, persiguiendo “profetanan” y “santonan.” (Revelacion 18:24) De echo, Babilonia e Grandi tin un odio asina profundo pa religion berdadero cu e ta persigui violentamente “e testigonan di Hesus” y asta ta mata nan. (Revelacion 17:6) Pues anto, e mohe aki cu yama Babilonia e Grandi claramente ta representa e imperio mundial di religion falso, cu ta inclui tur religion cu ta bai contra Yehova Dios.