PWUHKEN Kaudiahl kin audaudki mahsen kan me kin doadoahngki lokaiahn karasaras. Karasepe, e mahsanih duwen lih emen me ede “Papilon Lapalap” me ntinting nin temwe. Lih menet kin mwomwohd limwahn “aramas akan . . . oh wehi kan.” (Kaudiahl 17:1, 5, 15) E sansal me iren Paipel wet kin doadoahngki lokaiahn karasaras, pwehki sohte lih emen kak wia met. Kahrehda Papilon Lapalap kaidehn uhdahn lih emen. Eri, dahme lihen netiki paliwere menet kin karasahda?

Kaudiahl 17:18 kin kawehwehda lih menet nin duwen “kahnimw lapalap me kakaun nanmwarkien sampah kan.” Lepin lokaia “kahnimw” kin kasalehda me mie pwihn en aramas ehu. Pwehki “kahnimw lapalap” wet kin kakaun “nanmwarkien sampah kan,” lih menet me adaneki Papilon Lapalap kin wia pwihn kehlail ehu me mi sampah pwon. Pwihn wet kin wia pwihn en pelien lamalam ehu. Tehk ia duwen ekei iren Paipel kan nan pwuhken Kaudiahl ar kin sewese kitail en wehwehki met.

 Mahsen en Koht mahsanih me “nanmwarkien sampah kan” de palien politik en sampah wiadahr “dipen kamwahl” reh. Kahrehda lih menet me adaneki Papilon Lapalap kaidehn pwihn en palien politik ehu. En liho dipen kamwahl rehrail kin wehwehki me e kin ehuiong kaun akan en sampah oh wia soahng sohte lipilipil pwehn alehdi manaman pohrail. Ihme kahrehda e adaneki “lihen netiki paliwere ndand meno.”​—Kaudiahl 17:1, 2; Seims 4:4.

Paipel pil mahsanih me “sounnet kan en sampah” me kin wehwehki pwihn en palien pesines pahn mwahieiki liho ni ahnsou me e pahn sohrala. Kahrehda Papilon Lapalap sohte kak wia pwihn en palien pesines ehu. Paipel kin kasalehda me nanmwarki kan oh sounnet kan koaros kin “uh dohweisang” oh kilikilang Papilon Lapalap eh sohrala. (Kaudiahl 18:3, 9, 10, 15-17) Ihme kahrehda e pwung kitail en nda me Papilon Lapalap kaidehn pwihn en palien politik ehu de pwihn en palien pesines ehu, ahpw e wia pwihn en pelien lamalam ehu.

Paipel pil mahsanih me lih menet kin pitihkidier aramas koaros en sampah eh “widing kan.” (Kaudiahl 18:23) Ni lokaiahn Krihk, lepin lokaia me kadoadoahk wasaht kin pid “wiewiahn wunahni.” Met pil kin kasalehda me Papilon Lapalap kin pid pelien lamalam. Pwehki wiepen wunahni koaros kin pid pelien lamalam oh re kin kohsang manaman en ngehn saut kan, e sohte kapwuriamwei me Paipel kin kahdaneki Papilon Lapalap “dewen ngehn suwed kan oh ngehn saut kan koaros.” (Kaudiahl 18:2; Deuderonomi 18:10-12) Paipel pil kin kasalehda me pwihn wet kin uhwong kaudok mehlel oh kin kaloke “soukohp oh sapwellimen Koht aramas akan.” (Kaudiahl 18:24) Ni mehlel Papilon Lapalap kin inenen kailongki kaudok mehlel kahrehda e kin kaloke oh kemehla “sounkadehdehn Sises” kan. (Kaudiahl 17:6) Ihme kahrehda e sansal me lih menet me adaneki Papilon Lapalap kin wehwehki pwihn en pelien lamalam kan koaros me kin uhwong Siohwa Koht.