TE KI ra te puka a Apokalupo i te au akakite anga kare e tau kia marama tikai ia. (Apokalupo 1:1) Ei akaraanga, te taiku ra te reira i tetai vaine ma te ingoa “Babulonia Maata” tei tataia i runga i tona rae. Te karangaia ra teia vaine e te noo ra ki runga i te ‘au urupu maata e te au enua.’ (Apokalupo 17:​1, 5, 15) Mei te mea kare e vaine tikai e rauka i te rave i teia, te riro ra i reira a Babulonia Maata ei mea akatutu anga. No reira, eaa ta teia vaine akaturi tutu ua e akatutu maira?

Ia Apokalupo 17:18, te akatutuia ra taua vaine akatutu ra e “ko taua oire maata ra ïa, ko tei tutara ki rungao i te au ariki o te ao nei.” Te tuatua “oire” te akakite maira i tetai pupu tangata akaaereia. Mei te mea te akatere ra teia “oire maata” ki rungao  i “te au ariki o te ao nei,” te ingoa o te vaine Babulonia Maata ka tau e e akaaerenga mana maata te reira i te pa enua katoa. Ka tau i reira kia kapikiia te reira e patireia o teianei ao. Eaa te reira tu patireia? E mea akonoanga. Ka akara ana e akapeea etai au irava mei teia i roto i te puka a Apokalupo i te arataki anga ia tatou ki teia taopenga anga.

Ka riro tetai patireia ei mea poritiki, ei kimi anga puapinga, me kore ei mea akonoanga. Te ingoa o te vaine ko Babulonia Maata kare ia i tetai patireia poritiki no te mea te akakite ra te Tuatua a te Atua i “te au ariki o te ao nei,” me kore te au tuanga poritiki o teianei ao, ‘tei akaturi’ ra kiaia. Te tuatuaia ra tana akaturi no te au piri anga tana i akatupu ma te au tutara o te enua e te akamaramaia maira te tumu i kapikiia ai aia ko “te vaine akaturi maata.”​—Apokalupo 17:​1, 2; Iakobo 4:4.

Kare a Babulonia Maata i te patireia kimi anga puapinga no te mea “te aronga oko o te ao nei,” tei akatutu ra i te au tuanga kimi anga puapinga, ka aue iaia i te tuatau o tona akapou anga. Te tika, te au ariki e te aronga oko e akatutuia ra te akara atura ia kia Babulonia Maata mei te ngai “atea ke.” (Apokalupo 18:​3, 9, 10, 15-17) No reira, e mea tau kia taopenga e kare a Babulonia Maata, i tetai patireia poritiki me kore e patireia kimi anga puapinga, inara e mea akonoanga.

Te akapapu maataia ra te akataka anga akonoanga o Babulonia Maata na te akakite anga e te arataki ke ra aia i te au pa enua katoatoa na roto i tana “ravenga purepure.” (Apokalupo 18:23) I te mea te riro ra te au tu purepure katoatoa e e akonoanga e e mea akauruia e te temoni, kare i te mea poitirere e te kapiki ra te Pipiria ia Babulonia Maata ei ngai “nooanga demoni.” (Apokalupo 18:2; Deuteronomi 18:​10-12) Te akatutu katoaia ra teia patireia e te patoi pakari ra i te akonoanga tika, te takinokino ra i “te au peroveta” e “te aronga tapu.” (Apokalupo 18:24) Te tika, no to Babulonia Maata makitakita maata i te akonoanga tika, te takinokino pakari tikai ra aia e te tamate ra i “te aronga kite o Iesu.” (Apokalupo 17:6) No reira, teia vaine tona ingoa ko Babulonia Maata te akatutu taka maira i te patireia akonoanga pikikaa o teianei ao, te ka kapiti mai te au akonoanga katoatoa te tu ra i te patoi i te Atua ko Iehova.