‘ONASOA
‘Ineag ne “Papilön Ti‘ ta”
PUK ne Kel‘ȧk Tē ma ‘on fäeag a‘tatạu‘ȧk ma‘oi. (Kel‘ȧk Tē 1:1) La fakse, ‘on fäeag‘ạkiạg ne hạnit ne ma ‘on asat ne fȧ‘ se ‘on motara “Papilön Ti‘ ta.” Hȧn te‘is päepäe ‘e rer ne “kakại ma kạuag hanua, ma pure‘ag.” (Kel‘ȧk Tē 17:1, 5, 15) Ma ‘e reko kat ‘es ra ta hạnit la po la re te te‘is, ma Papilön Ti‘ ta iạ la fäeag a‘tatạu‘ạkit. Ma tes ta fäeag a‘tatạu‘ȧk ‘on hȧn mös fa ta?
‘E Kel‘ȧk Tē 17:18, iạ hȧn ‘esea ma, ma iạ “hanuạ noh ti‘ut ne ‘es puer faksau se te‘ ne sau ne rȧn te‘.” Fäeag hete‘ “hanuạ noh ti‘ut” rak‘ạkim ta kạuag famör ma‘oit. Ma ‘e reko “hanuạ noh ti‘ ta” ne ‘es puer se te‘ ne “sau ne rȧn te‘,” ma hȧn ta ne he‘ Papilön Ti‘ ta, iạ ta kạuạg famör ma‘oi ne forȧs se rȧnte‘ ‘atakoa. Iạ po la ‘ea, matantu faksạu ne rȧnte‘. Ka iạ matantu tapenet? Iạ matantu fakrotut. ‘Is la po la räe ma aier‘ȧk ‘e ut ma‘oi ne fäeag‘ȧk ‘e puk ne Kel‘ȧk Tē.
Matantūut, iạ la po la fakpolitik, fakpesnes ne fakrot. Hạnit ne he‘ Papilön Ti‘ ta iạ ‘eake matantu fakpolitikit, po ‘e Puk Ha‘a ‘ea ne “sau ne rȧn te‘,” ne te‘ ne te ne täe ‘e laloag ne matantu fakrȧn te‘, a‘sok vạhia “mös ‘e‘eve” ma hȧn ta. ‘On mös ‘e‘eve ta ‘on te ag‘eseat ma sạu ne rȧnte‘ ma kel‘ạkia ‘on hün het ne he‘ “hȧn mös fā ti‘ ta.”—Kel‘ȧk Tē 17:1, 2; Jemesa 4:4.
Papilön Ti‘ ta ‘eake matantu fakmone ‘e reko “te‘ ne lelea‘ hạitogiag tē ne rȧn te‘,” täla ouou‘ạkia hȧn ta ‘e avat ne la a‘öf pạu e iạ. Te‘ ne sạu ma iris lelea‘ tög‘ȧk te rak‘ȧk ne iris la “fufueris ‘e sousou ta” ‘e Papilön Ti‘ ta (Kel‘ȧk Tē 18:3, 9, 10, 15-17) Ta hün het ne ‘ea e ne Papilön Ti‘ ta iạ ‘eake matantu fakpolitiki, ne matantu fakpesnese, ka iạ matantu fakrotu.
‘On la ‘ineag ne matantu fakrotut ne kel‘ạkia Papilön Ti‘ ta, fäeag‘ȧk a‘taf ma aier‘ȧk pạu ‘e ‘on garue‘ạkiạg ne “garue ‘on timonio” ma hoa‘ sese famör ma‘oi pạu ‘e rȧnte‘ (Kel‘ȧk Tē 18:23) Te‘ ne garue ne a‘es‘ao‘ạkia te faktimonio, iạ rotut se irisa ‘e reko iris po hạiasoag ‘e timonio ma ‘eake te a‘ferehiti te ne Puk Ha‘a ‘ea ‘e reko Papilön Ti‘ ta “ta nohoag ‘on timonio.” (Kel‘ȧk Tē 18:2; Nā Hoi‘ạkiạg ne Foho 18:10-12) Matantu te‘ ta fäeag‘ạkim ‘on fir‘ạkiag ne rot aire, ma ‘on al‘ạkiạg ne “lelea‘ parofiat” ma “lelea‘ ha‘.” (Kel‘ȧk Tē 18:24) ‘On aire, Papilön Ti‘ ta ma ‘on fek ti‘ut se rot aier ta ma iạ a‘mamauạ ma al‘ȧk “uetnes ‘on Jisu.” (Kel‘ȧk Tē 17:6) Hȧn te‘ ne he‘ Papilön Ti‘ ta kel‘ȧk a‘taf pạu matantu ne rot sioksiko ‘e rȧnte‘ ma te‘ ne rot ne fū ‘e hạiagạiget ma ‘amnȧk ‘on Jihova ‘Ạitu.
