FAGNOHARAGNE ty irehafagne ty raha ila’e amy Apokalypsy ao. (Apokalypsy 1:1) Rehafegne ao fa misy ampela raike misy agnaragne “Babylona Jabajaba” ty handri’e. Mitoboke ambone ‘ty ndaty maro naho firenena’ reke. (Apokalypsy 17:1, 5, 15) Tsy misy ampela mahavita izay. Izay ty andrambesegne aze amy ty heve’e agn’ohatse manao tihoe Babylona Jabajaba. Inogne ka ty anoagne aze tsimiriragne?

 Rehafe ty Apokalypsy 17:18 fa “tanàgne jabajaba mifehe ze mpanjaka an-tane etoy” o ampela iohoe. Fikambanagne misy vondroa o ndaty nalamigne ty dika o “tanàgne” iohoe. “Tanàgne Jabajaba” ka i ampela atao tihoe Babylona Jabajabay, sady managne fahefagne amy ty “mpanjaka an-tane etoy.” A naho izay areke ty fandeha’e, le fikambanagne managne fahefagne magneneke ty tane toy reke. Fahefagne amy ty inogne? Fahefagne miomba ty fivavahagne. Magnamaregne izay ty andalan-teny ila’e amy Apokalypsy ao.

Va’e ho miomba ty polotike, ndra ty varotse, ndra ty fivavahagne ty fikambanagne raike. Faie tsy fikambanagne miomba ty polotike ty Babylona Jabajaba, fa mirehake ty Baiboly tie “niharo lamba tama’e” ty “mpanjaka an-tane etoy”, ndra ze mpitondra amy ty tontolo toy. Ty fiharoan-damba anoe’e, le ty fagnina iharoa’e amo o mpitondrao. Izay ty anto’e anoagne aze “tsimiriragne jabajaba.”—Apokalypsy 17:1, 2; Jakoba 4:4.

Tsy fikambanagne miomba ty varotse ka ty Babylona Jabajaba, kanao naho fa ho vonoegne reke, le hanahelo aze ze “mpanao varo-mandeha an-tane etoy”, ndra ze mpanao asam-barotse. Rehafegne ka fa hitalake aze ‘lavitse’ o mpanjakao naho o mpamarotseo. (Apokalypsy 18:3, 9, 10, 15-17) Izay ty mahavy antikagne mirehake tie fikambanagne miomba ty fivavahagne fa tsy miomba ty polotike ndra miomba ty varotse ty Babylona Jabajaba.

Maregne vata’e zay fa mamitake ndaty an-tane etoy ‘hifandrambe amy ty fagnahy raty’ reke. (Apokalypsy 18:23) Boake amy ty demonia ze karazan-draha ifandrambesagne amy ty fagnahy raty, sady mbe fivavahagne avao ka ty firehafagne izay. Tsy mahalatsa naho “fitoboha ty demonia” ty anognona ty Baiboly i Babylona Jabajaba. (Apokalypsy 18:2; Deoteronomia 18:10-12) Rehafegne ao ka fa malaigne mafe ty fivavahagne maregne reke, sady malaigne o “mpitokio” naho o “ndaty masigneo.” (Apokalypsy 18:24) Heje’e vata’e ty fivavahagne maregne kanao le liere’e mafe sady vonoe’e ze “vavaolombelo i Jesosy” himateza’e. (Apokalypsy 17:6) Mazava hinane zay fa i ampela atao tihoe Babylona Jabajabay, le ze fivavahan-diso amy ty tane toy iaby, agnisa izay ze fivavahagne malaigne i Jehovah Andrianagnahare.