EITABO loka Apukokinio ajatotor akiror nuepolok nuitetemitai kitosomaete aanyununeta. (Apukokinio 1:1) Kwape aanyunet, inerit ngesi nuikamunitos aberu na ejatotor kede ekiror loiwadikatai oreet ke “Babulon Nakapolon.” Ebakai ebe iboie aberu na ‘kokodeta ka atekerin.” (Apukokinio 17:1, 5, 15) Kwape emameor aberu obe naepedor aswam nu, ibusakinit do Babulon Nakapolon korai aitupuset. Inyoin bodo ebwoikit aitupuset naka adote kana?

Kotoma Apukokinio 17:18, itetemitai aberu napana nakawaragan kwape “ere lokapolon loirumit ikabakan luka akwap.” Akirot “ere” itodunit atukot naka itunga luiswamaete  nepepe. Kwape eyaitor “ere lokapolon ikabakan luka akwap,” ibusakit do aberu na naenyaritai Babulon Nakapolon korai atukot naejaasi kede apedor kakwap kere. Edolit do anyara ngesi kwape atukot naka idiinin kere lukaisab luitepegete Yawe. Koany epone lo ingarakinata oni aiwadikaeta ace nukoitabo loka Apukokinio amisikin kwangin.

Aberu naenyaritai Babulon Nakapolon mam erai apugan araibo agwelanarak konye idiinin lukaisab, naarai itetemit Akirot naka Edeke ebe ‘edotete ikabakan araibo epugak luka akwap kangesi.’ Akedoteu erai epaperone loejatotor ngesi kede epugak luka akwap kana ido itodunit ngin apolou naenyaritere nges “naadote nakapolon.”​—Apukokinio 17:1, 2; Yakob 4:4.

Mam Babulon Nakapolon bobo epedori araut atukot naka ikagwelanarak naarai “ikagwelanarak luka akwap,” luebwoikinitos alibuneta nuka agwelanar, ebunete aimony ngesi kapak naemudiarere nges. Kabeit, itetemitai ebe esesenete nepepe ikabakan ka ikagwelanarak Babulon Nakapolon “kama elwana.” (Apukokinio 18:3, 9, 10, 15-17) Kanukangun edolit do atemar ebe mam Babulon Nakapolon erai ­atukot ­naka epugak araibo naka ikagwelanarak, konye naka idiinin.

Iyatakitos bobo akiro nuka Ebaibail nuebalas ebe itapaarit ngesi atekerin kere kede ‘ekecudete’ aitejenun ebe erai Babulon Nakapolon idiinin lukaisab. (Apukokinio 18:23) Kwape elibunata nuecudet kere kanejaasi idiinin lukaisab ka ajokin, man erai nuka aumokin ebe enyarit Ebaibuli Babulon Nakapolon “aibois naiboioto ajokin.” (Apukokinio 18:2; Ikisila 18:10-12) Itetemitai bobo ebe ekukurikit atukot na aitepeg ediini loka abeit, koreite “inabin ka lukalaunak.” (Apukokinio 18:24) Kabeit, engara koreite noi da Babulon Nakapolon ediini lokabeit ka aiyar da “ikajenak luka Yesu.” (Apukokinio 17:6) Kanukangun, aberu na naeyaritai Babulon Nakapolon kaidelel, erai naebwoikit atukot naka idiinin kere ­lukaisab, ­luimoriaritosi idiinin kere lu ejaasi itepegete Edeke Yawe.