DIBUKU di’Ɛnyɛlɔ diekɔ la ditelo diahahombe mbɔsama lo yoho ya mɛtɛ mɛtɛ. (Ɛnyɛlɔ 1:1) Ɛnyɛlɔ, diɔ tɛkɛtaka dia womoto lofundjiwɔ lo mfumu kande ɔnɛ “Babilɔna ka Woke.” Diɔ mbutaka ɔnɛ womoto ɔsɔ mbidjasɛ lâdiko dia “elui w’anto ndo wedja.” (Ɛnyɛlɔ 17:1, 5, 15) Lam’ele ndoko womoto la mɛtɛ mɛtɛ lakoka nsala dui sɔ, Babilɔna ka Woke pombaka monga didjidji. Ko womoto la numba la didjidji ɔsɔ alembetshiyande?

Lo Ɛnyɛlɔ 17:18, womoto la didjidji ɔsɔ mbelamɛka ɔnɛ “osomba wa woke wele la lowandji laadiko dia nkumi ya dikanga ya la nkɛtɛ.” Tshɛkɛta “osomba” mɛnyaka olui w’anto wokongɛmi. Lam’ele “osomba wa woke” ɔsɔ wekɔ lo mbolɛ “nkumi ya dikanga ya la nkɛtɛ,” womoto lelamɛ Babilɔna ka  Woke pombaka monga okongamelo wele la shɛngiya l’andja w’otondo. Tɔ koka mɛtɛ mbelamɛ ɔnɛ tshunda dia l’andja w’otondo. Ko woho akɔna wa tshunda? Tshunda d’ɛtɛmwɛlɔ. Tende woho watokonya avɛsa amɔtshi wa lo dibuku di’Ɛnyɛlɔ dia mbuta ngasɔ.

Tshunda koka monga dia pɔlitikɛ, di’okanda kana di’ɛtɛmwɛlɔ. Womoto lelamɛ Babilɔna ka Woke kema tshunda dia pɔlitikɛ nɛ dia Ɔtɛkɛta wa Nzambi mbutaka dia “nkumi ya dikanga ya la nkɛtɛ” kana ase pɔlitikɛ wa l’andja ɔnɛ “yakasale monanyi la nde.” Babilɔna ka Woke kekɔ lo nsala monanyi l’ɛnɔmbɔdi wa la nkɛtɛ nyɛ lo woho wadjande la wɔ toseke ndo diakɔ dielamɛnde ɔnɛ “womoto la numba ka lokolokolo.”​—Ɛnyɛlɔ 17:1, 2; Jakɔba 4:4.

Babilɔna ka Woke hakoke monga tshunda di’amundji w’okanda nɛ dia “amundji w’okanda wa la nkɛtɛ” wayolela lam’ayondolanyema. Ɔnkɔnɛ, nkumi ya dikanga l’amundji w’okanda wayotangɛka Babilɔna ka Woke lo “tshalola.” (Ɛnyɛlɔ 18:3, 9, 10, 15-17) Diakɔ diakokaso mbuta dia Babilɔna ka Woke kema tshunda dia pɔlitikɛ kana di’amundji w’okanda, koko di’ɛtɛmwɛlɔ.

Woho wanganyiya Babilɔna ka Woke anto lo tshimbo ya “ditshelo dia[nde] di’akambo w’ɛdiɛngɛ” ekɔ djembetelo kina yatokimanyiya dia nshikikɛ dia tɔ kekɔ tshunda di’ɛtɛmwɛlɔ wa l’andja w’otondo. (Ɛnyɛlɔ 18:23) Lam’ele weho tshɛ w’osakelo w’ekanga ndja oma l’ɛtɛmwɛlɔ wa kashi ndo oma le ɛdiɛngɛ, hatokoke mamba woho welɛ Bible Babilɔna ka Woke ɔnɛ “edjaselo k’ɛdiɛngɛ.” (Ɛnyɛlɔ 18:2; Eohwelo k’Ɛlɛmbɛ 18:10-12) Tshunda sɔ diekɔ lo ndɔshana nto la wolo tshɛ la ɔtɛmwɛlɔ wa mɛtɛ lo nsoya “amvutshi” ndo “ekilami.” (Ɛnyɛlɔ 18:24) Diakɔ diele, Babilɔna ka Woke kekɔ la lohetsho l’efula otsha le ɔtɛmwɛlɔ wa mɛtɛ, lohetsho lotshutshuya dia nsoya ndo kânga ndjaka “ɛmɛnyi wa Yeso.” (Ɛnyɛlɔ 17:6) Ɔnkɔnɛ, womoto ɔsɔ lelamɛ Babilɔna ka Woke nembetshiyaka mɛtɛ tshunda di’ɛtɛmwɛlɔ wa kashi wa l’andja w’otondo, mbuta ate ɛtɛmwɛlɔ tshɛ walɔshana la Jehowa Nzambi.