A BHUKU ga Kuvululelwa gi na ni magezu ma nga faneliko ku zwisisiwa hi ndlela ya xiviri. (Kuvululelwa 1:1) Hi xikombiso, gona gi wulawula hi wasati a tsalilweko vito gi nge “Babuloni wa hombe” laha ximombyeni xakwe. Ku wuliwa lezaku a wasati loye i tshamile hehla ka “zidlemo, ni matiko.” (Kuvululelwa 17:1, 5, 15) Kota lezi ku nga hiko ni wasati wa xiviri a zi kotako ku maha lezo, Babuloni wa hombe i fanele kuva wo fananisa. Makunu, xana a xibhayi lexo xo fananisa xi yimela yini?

Lomu ka Kuvululelwa 17:18, a wasati yaloye wo fananisa i wuliwa lezaku i “muti wa hombe, lowu wu fumako hehla ka tihosi ta misava.” A gezu “muti,” kutani doropa, gi xungeta a ntlawa  wa vanhu wu xaxametilweko. Kota lezi a ‘muti lowo wa hombe’ wu fumelako a “tihosi ta misava,” a ku na kukanakana ka lezaku a wasati loye a vitwako Babuloni wa hombe i hlengeletano yi nga ni ntamu wa ku kucetela zilo matikweni yo tala. Yena i fanelwa khwatsi hi ku vitaniwa a ku mufumo wa misava yontlhe. Mufumo wa lixaka muni? Wa wukhongeli. Wona lezi a mavesi yo kari lawa ma yelanako lomu ka bhuku ga Kuvululelwa ma hi chiketisako zona ka magumo lawo.

A mufumo wa zi kota kuva wa wupolitika, wa mabhinzu, kutani wa wukhongeli. A wasati loyi a vitwako Babuloni wa hombe a hi mufumo wa wupolitika hakuva a Mhaka ya Nungungulu yi wula lezaku a “tihosi ta misava,” kutani mitlawa ya wupolitika ya tiko legi, ‘ti lo bhaya’ naye. A wubhayi gakwe gi wula a kuzwanana loku a ku mahako ni vafumeli va misava leyi niku gi tlhamusela a ku hikuyini a vitwako “xibhayi xa hombe.” — Kuvululelwa 17:1, 2; Jakobe 4:4.

Babuloni wa hombe a nga zi koti kuva mufumo wa mabhinzu hakuva a “vamahungani va misava,” va yimelako mitlawa ya vanyamabhinzu, va ta mu rilela a xikhati lexi a to loviswa ha xona. Hi lisine, ku wuliwa lezaku a tihosi ni vamahungani va cuwuka Babuloni wa hombe na va hi “kule.” (Kuvululelwa 18:3, 9, 10, 15-17) Hikwalaho, za hehuka a ku wula lezaku Babuloni wa hombe a hi mufumo wa wupolitika, ge hambu wa mabhinzu, kanilezi mufumo wa wukhongeli.

A ku tiva lezaku Babuloni wa hombe mufumo wa wukhongeli zi tiyisiwa hi magezu lawa ma nge ngalo yena i khohlisa matiko wontlhe hi “kuloya” kakwe. (Kuvululelwa 18:23) Kota lezi a tixaka tontlhe ta wungoma ti tako hi ka madimoni, a zi hlamalisi lezaku a Biblia gi vitana Babuloni wa hombe a ku “wutshamu ga madimoni.” (Kuvululelwa 18:2; Deuteronome 18:10-12) Ku wuliwa kambe lezaku a mufumo lowo wu venga nguvu a wukhongeli ga lisine, wu xanisa “vaprofeti” ni “vobasa.” (Kuvululelwa 18:24) Hakunene, Babuloni wa hombe i na ni livengo lelo la hombe hi wukhongeli ga lisine laha ko kala a xanisa hi tihanyi a tlhela a daya “vakustumunyu va Jesu.” (Kuvululelwa 17:6) Hikwalaho , zi te dlunya lezaku a wasati loye a vitwako Babuloni wa hombe i yimela a mufumo wa misava yontlhe wa wukhongeli ga mawunwa, lowu wu patsako a wukhongeli gontlhe legi gi vukelako Jehova Nungungulu.