I ROTO i te buka Apokalupo, te vai ra te tahi mau parau eiaha e taahia i roto i to ratou auraa mau. (Apokalupo 1:1) Ei hi‘oraa, te faahitihia ra te hoê vahine ua papaihia te i‘oa ra “Babulonia rahi” i nia i to ’na rae. Te parauhia ra e te parahi ra tera vahine i nia i te “mau pǔpǔ rarahi taata” e te “mau fenua.” (Apokalupo 17:1, 5, 15) I te mea e aita e vahine mau e nehenehe e na reira, e auraa taipe ïa to Babulonia rahi e tia ’i. Eaha ïa ta teie vahine faaturi taipe e faahoho‘a ra?

I roto i te Apokalupo 17:18, te faataahia ra taua noâ vahine taipe ra mai te “oire rahi . . . o tei hau i te mana i nia iho i te  hui arii o te ao nei.” Te faaite ra te ta‘o “oire” i te hoê pǔpǔ taata faanahohia. I te mea e e mana to tera “oire rahi” i nia i “te hui arii o te ao nei,” e faanahonahoraa mana nunaa rau ïa te vahine parauhia o Babulonia rahi e tia ’i. E tano ia parau e e hau emepera o te ao atoa te reira. Teihea huru hau emepera? I te pae faaroo ïa. A tapao na e nafea te tahi mau irava tapiri i roto i te buka Apokalupo e faataa ’i i taua faaotiraa ra.

Te vai ra te hau emepera poritita, tapihoo, aore ra faaroo. E ere te vahine parauhia o Babulonia rahi i te hoê hau emepera poritita no te mea ia au i te Parau a te Atua, ua “faatur[i] . . . te hui arii o te ao nei,” aore ra te mau tuhaa poritita o teie nei ao, e o ’na. To ’na faaturi, o te mau faufaa ïa ta ’na i faaau i te feia faatere o teie fenua e te rave nei oia i tei nehenehe ia noaa ia ’na te mana e ia ohipa te reira i nia ia ratou. No reira oia e parauhia ’i “te vahine faaturi rahi.”—Apokalupo 17:1, 2; Iakobo 4:4.

E ere o Babulonia rahi i te hoê hau emepera tapihoo no te mea e auê “te feia hoo o te ao nei,” o te faahoho‘a ra i te mau tuhaa tapihoo, ia haamouhia oia. Oia mau, te parauhia ra e e hi‘o te hui arii e te feia hoo atoa ia Babulonia rahi na “te atea ê” mai. (Apokalupo 18:3, 9, 10, 15-17) No reira, e mea tano ïa ia faaoti e e ere o Babulonia rahi i te hoê hau emepera poritita aore ra tapihoo, e hau emepera faaroo râ.

Te haapapu-atoa-hia ra te huru faaroo o Babulonia rahi e te parau e te haavare ra oia i te mau fenua atoa i ta ’na “peu tahutahu.” (Apokalupo 18:23) I te mea e no ǒ mai te mau huru peu tahutahu atoa i te haapaoraa e i te demoni ra, e ere ïa i te mea maere ia parau te Bibilia ia Babulonia rahi “ei parahiraa demoni.” (Apokalupo 18:2; Deuteronomi 18:10-12) Te parau-atoa-hia ra e te patoi roa ra tera hau emepera i te haapaoraa mau, ma te hamani ino i “te mau peropheta” e “te feia mo‘a.” (Apokalupo 18:24) Oia mau, no te riri iti rahi o Babulonia rahi i te haapaoraa mau e hamani ino u‘ana ’i e e haapohe atoa ’i oia i “te mau ite no Iesu.” (Apokalupo 17:6) No reira, te faahoho‘a maitai ra tera vahine o Babulonia rahi te i‘oa i te hau emepera o te ao atoa o te haapaoraa hape, tae noa ’tu te mau haapaoraa atoa e patoi ra i te Atua ra o Iehova.