VELIVULU Liesituluilo tu sangamo olondaka vimue okuti ka vi lomboloka ndomo via sonehiwa. (Esituluilo 1:1) Olio li tukula ukãi umue okuti pupolo waye pa sonehiwa onduko yiti ‘Bavulono Yinene.’ Ukãi waco vo tukulavo hati wa tumãla “kovava a lua.” Ovava aco a lomboloka “omanu lawiñi.” (Esituluilo 17:1, 5, 15) Omo okuti lomue ukãi o tẽla oku ci linga,  eci ci lekisa okuti o Bavulono Yinene, hukãiko muẽle. Oco hẽ ocipuepue caco ci lomboloka nye?

Kelivulu Liesituluilo 17:18, ukãi waco o tukuiwa okuti “eye imbo linene li viala olosoma vio kilu lieve.” Ondaka imbo yi lomboloka ocimunga comanu. Omo okuti ‘imbo liaco linene’ kuenda li viala “olosoma vio kilu lieve,” eci ci lekisa okuti ukãi waco ocisoko cimue ci kuete unene, ci sangiwa voluali luosi. Ocisoko caco hẽ cipi? Ocisoko caco catavo. Tu konomuisi ndomo ovinimbu vimue velivulu Liesituluilo vi tu tuala kelomboloko eli.

Ocisoko ci tava okuti ci kala copulitika, colomĩlu, ale cetavo. Ukãi wa tukuiwa ndeti hati, Bavulono Yinene, hacisokoko copulitika. Momo Embimbiliya li tu sapuila hati “olosoma vio kilu lieve” ale vakuapulitika, ‘via linga laye evĩho liukahonga.’ Eye o linga evĩho liaco poku linga ukamba lolosoma vio kilu lieve. Eli olio esunga lieci ukãi waco a tukuiwila hati, ‘ocipuepue cinene.’—Esituluilo 17:1, 2; Tiago 4:4.

O Bavulono Yinene, ka ci tavavo okuti yi kala ocisoko colomĩlu. Momo “vakuakufũla kilu lieve” okuti vakualomĩlu, vaka lila eci yika nyõliwa. Embimbiliya li popiavo okuti olosoma lavakualomĩlu vaka talamẽla “kupãla” oku vanja eyambulo lio Bavulono Yinene. (Esituluilo 18:3, 9, 10, 15-17) Omo liaco, o Bavulono Yinene, hacisokoko co pulitika ale colomĩlu. Pole, ocisoko catavo esanda.

Cimue ci tu lekisavo okuti o Bavulono Yinene ocisoko catavo esanda, ceci tu tanga Vembimbiliya ci lekisa okuti olofeka viosi vi kasi oku kembiwa “lumbanda” wayo. (Esituluilo 18:23) Omo okuti ovina viosi viatiamẽla kumbanda vi vetiyiwa lolondele, ca sunguluka okuti o Bavulono Yinene yi tukuiwa hati, ‘imbo liolondele.’ (Esituluilo 18:2; Esinumuĩlo 18:10-12) Ocisoko caco ka ci sole etavo liocili. Momo ca siata oku lambalala ‘ovaprofeto lolosandu.’ (Esituluilo 18:24) Ocili okuti o Bavulono Yinene, ya suvuka etavo liocili kuenda ya siata oku lambalala loku ponda ‘olombangi via Yesu.’ (Esituluilo 17:6) Cosi eci ci lekisa okuti ukãi o tukuiwa ndeti hati, Bavulono Yinene, eye muẽle ocisoko catavo osi esanda voluali. Atavo aco osi a suvuka Yehova Suku.