TE TAHI ’U FAKAMAHINO
Ko Ai Ia “Papiloni Lahi”?
’I TE tohi ’o Apokalipesi ’e tou ma’u ai te ’u palalau fakatātā. (Apokalipesi 1:1) Ohage la, ’e talanoa ai ’o ’uhiga mo te fafine ’e tohi ’i tona la’e ia te higoa ko “Papiloni Lahi.” ’E ’ui ko te fafine ’aia ’e heka ki “te ’u haha’i tokolahi, te ’u pule’aga.” (Apokalipesi 17:1, 5, 15, MN) ’E mole feala ki he fafine mo’oni ke ina fai ia te fa’ahi ’aia, koia ko te kupusiga palalau Papiloni Lahi ’e ko he palalau fakatātā. Kae koteā ’aē ’e fakatātā e te fafine paomutu ’aia?
Iā Apokalipesi 17:18 (MN), ’e ’ui ai ko te fafine fakatātā ’aia ’e ko “te kolo lahi ’aē ’e ’i ai tona pule’aga ’e pule ki te ’u hau ’o te kele.” Ko te kupu “kolo” ’e faka ’uhiga ki he kautahi. Kapau ko te “kolo lahi” ’aia ’e ina pule’i “te ’u hau ’o te kele,” pea ko te fafine ’aē ’e higoa ko Papiloni Lahi ’e ko te kautahi mālohi ’e pule ’i te malamanei kātoa. Koia ’aē ’e fakahigoa’i ai ko te kautahi faka malamanei. Koteā te fa’ahiga kautahi ’aia? Ko te kautahi faka lotu. ’Aki te tahi ’u vaega ’i te tohi ’o Apokalipesi, ’e tou ma’u ai te mahino ’aia.
Ko he kautahi ’e feala ko he kautahi faka politike, faka koloā, pe’e faka lotu. Kae ko te fafine ’aē ’e higoa ko Papiloni Lahi ’e mole ko he kautahi faka politike, kote’uhi ’e ’ui ’i te Folafola ’a te ’Atua ko “te ’u hau ’o te kele,” pe’e ko te ’u kautahi faka politike ’o te malamanei, ’e nātou “fai folonikasio” mo ia. Ko tana folonikasio ’e ko te ’u fuakava ’aē ne’e ina fai mo te kau takitaki ’o te kele, ko te tupu’aga la ’aia ’o tona fakahigoa’i ko “te fafine paomutu lahi.”—Apokalipesi 17:1, 2, MN; Sakopo 4:4.
Ko Papiloni Lahi ’e mole feala ke ’ui ’e ko he kautahi ’e gāue fai koloā, kote’uhi ko te “kau fakatau koloā fe’olo’aki ’o te kele,” ’aē ’e nātou fakatā te ’u gāue fai koloā, ’e nātou putu anai ’i te temi ’aē ka faka’auha ai. Ei, ko te ’u hau pea mo te kau fakatau koloā ’e ’ui ’e nātou tutu’u anai mai “mama’o” ’o sio’i ia Papiloni Lahi. (Apokalipesi 18:3, 9, 10, 15-17, MN) Koia, ’e tonu tatatou ’ui ’aē ko Papiloni Lahi, ’e mole ko he kautahi faka politike pe’e gāue fai koloā, kae ’e ko he kautahi faka lotu.
Ko te tahi fakamo’oni ’aē ko Papiloni Lahi ’e ko te kautahi faka lotu, ’e ko tana fakahēhē ia te ’u pule’aga fuli ’aki tana ’u ‘me’a faifakalau’akau.’ (Apokalipesi 18:23) Ko te ’u me’a faifakalau’akau fuli ’e ko he ’u me’a faka lotu pea mo fakatemonio, koia ’aē ’e fakahigoa’i ai ’i te Tohi-Tapu ia Papiloni Lahi, ’e ko “he nofo’aga ’o te kau temonio.” (Apokalipesi 18:2, MN; Teutalonome 18:10-12) Ko te kautahi ’aia ’e toe ’ui ’e fakafeagai mālohi ki te tauhi mo’oni, he’e ina fakataga’i te kau “polofeta” pea mo te “kau ma’oni’oni.” (Apokalipesi 18:24, MN) Ei, ’e fehi’a ’aupito ia Papiloni Lahi ki te tauhi mo’oni, koia ’aē ’e ina fakataga’i mālohi ai pea mo ina fakapogi “te kau fakamo’oni ’a Sesu.” (Apokalipesi 17:6, MN) Koia, ko te fafine ’aia ko Papiloni Lahi, ’e ina fakatātā lelei te kautahi faka malamanei ’o te ’u lotu hala, ’aē ’e faka ’uhiga ki te ’u lotu fuli ’aē ’e nātou fakafeagai kiā Sehova ’Atua.