„გამოცხადებას“ თიცალ სიტყვეფს დო ფრაზეფს შეფხვადუთ, ნამუთ პირდაპირ მნიშვნელობათ ოკო ვეგებგათ (გამოცხადება 1:1). მაგალთო თექ მოშინაფილ რე ოსურ, ნამუსით ჸვას მიკოჭარუ „დიდ ბაბილონი“. „გამოცხადებაშ“ წიგნის ინოჭარ, ნამდა თე ოსურ გეხე „ხალხეფს, ჯგუფეფს [დო] ერეფს“ (გამოცხადება 17:1, 5, 15). მუშო ოკო რაგად, ნამთინ ოსურს ვეშიალებე თენა. თავრეშე იძირე, ნამდა „დიდ ბაბილონს“ სიმბოლურ მნიშვნელობა ოკო უღდას. მუს ასიმბოლოენს თე მეძავი?

გამოცხადებაშ 17:18-ს თე სიმბოლურ ოსურს „დიდ ქალაქი“ ჯოხო, „ნამუშ მეფობაშ თუდო რენა დედამიწაშ მეფეეფი“. სიტყვა „ქალაქი“ მეუთითენს ხალხიშ ორგანიზებულ ჯგუფშა. „დიდ ქალაქი“ „დედამიწაშ მეფეეფს“ მართუნს, ათეშგურშენ, ლოგიკურ რე  იფიფქრათ, ნამდა „დიდ ბაბილონს“ მსოფლიო მაშტაბით გავლენა უღუნ ფერ ორგანიზაცია იგულისხმებუ. თის შილებე მსოფლიო იმპერია ხოლო ჯოხოდას. ნამ იმპერიაშენ რე რაგადი? რელიგიურ იმპერიაშენ. მორთ ასე ქობძირათ, მუჭო მეპუნთ თე დასკვნაშა „გამოცხადებას“ მოჩამილ შხვა მუხლეფს ხოლო, ნამუთ „დიდ ბაბილონს“ ოხუ.

იმპერია შილებე რდას პოლიტიკურ, კომერციულ დო რელიგიური. არგამათ იძირე, ნამდა „დიდ ბაბილონი“ პოლიტიკურ იმპერია ვა რე, მუშენდა ბიბლია იჩიებ, ნამდა თიწკუმა „მეძავენდეს დედამიწაშ მეფეეფი“, ანუ თე ქიანაშ პოლიტიკურ გაერთიანებეფი დო ორგანიზაციეფი. თე სიმბოლურ ოსურ თი გაგებათ მეძავენს, ნამდა კავშირ უღუ პოლიტიკურ მართველეფწკუმა დო ირფელს შკიდაფულენს, გავლენაქ ქაშუასინ თიშენ. ზუსტას ათეშგურშენ ჯოხო თის „დიდ მეძავი“ (გამოცხადება 17:1, 2; იაკობი 4:4).

„დიდ ბაბილონი“ ვართ კომერციულ იმპერია რე, მუშენდა „დედამიწაშ დიდვაჭარეფი“, ანუ კომერციულ ორგანიზაციეფი თიშ განდაგურებას ირგუნდან იჸუაფ. წიგნი „გამოცხადებას“ ინოჭარ, ნამდა მეფეეფ დო დიდვაჭარეფ „დიდ ბაბილონშე“ „შორს გერდან იჸი“ (გამოცხადება 18:3, 9, 10, 15—17). თაშ ნამდა, „დიდ ბაბილონი“ ვართ პოლიტიკურ იმპერია რე დო ვართ კომერციული. თინა რელიგიურ იმპერია რე.

„დიდ ბაბილონი“ მუჭო რელიგიურ იმპერია რენ თეს ამტკიცენს ხოლო ართ ბიბლიურ მუხლი, ნამუთ იჩიებ, ნამდა თინა სპირიტიზმით ოჩილითუანს არძა ხალხის (გამოცხადება 18:23). სპირიტიზმიშ არძანერ ფორმა რელიგიურ ხასიათიშ რე დო დემონეფშე მოურს, ათეშგურშენ გასაკვირ ვა რე თინა, ნამდა ბიბლია „დიდ ბაბილონს“ „დემონეფიშ ბუდეს“ უძახუ (გამოცხადება 18:2; კანონი 18:10—12). ბიბლიას თინა ხოლო ინოჭარ, ნამდა თე იმპერია ოწინააღმდეგუ ჭეშმარიტ რელიგიას, თხოზუ „წინასწარმარაგადეეფს“ დო „წმინდანეფს“ (გამოცხადება 18:24). „დიდ ბაბილონს“ თიშმანწარათ ჯოგუ ჭეშმარიტ რელიგია, ნამდა ომაღურეთ თხოზუ „იესოშ მოწმეეფს“ დო თინეფიშ გოჭყვადუაშენ ხოლო ვარიას ვეჩიებუ (გამოცხადება 17:6). არგამა რე, ნამდა ოსურ, ნამუშ სახელი „დიდ ბაბილონ“ რე, ცრუ რელიგიაშ მსოფლიო იმპერია რე. თიშა მიშმურს არძა რელიგია, ნამუთ იეჰოვა ღორონთის ოპირისპირუ.