BUKU ja Ciunukuko jikwete maloŵe gane gangatukusosekwa kugapikana mwagalembele. Mwambone, jikusasala ya jwamkongwe jwele pausyo pakwe palembekwe lina lyakuti “Babiloni Jwamkulungwa.” Bukuji jikusasala kuti jwamkongweju atemi pa “mitundu ja ŵandu.” (Ciunukuko 17:1, 5, 15) Ligongo lyakuti  pangali jwamkongwe jwampaka atende yeleyi, yikuwoneka kuti Babiloni Jwamkulungwa akwimila cinecakwe. Sambano, ana jwamkongwe jwakulijesyaju akwimila cici?

Pa Ciunukuko 17:18, jwamkongwe jujuju akusamsala kuti ali “msinda wekulungwa . . . wawukulamulila ayimwene wosope ŵa pacilambo capasi.” Liloŵe lyakuti “msinda” likulosya kuti lili likuga lya ŵandu lyalikutenda yindu yimpepe. Ligongo lyakuti “msinda wekulungwa” ukwete ulamusi pa “ayimwene wosope ŵa pacilambo capasi,” nikuti jwamkongwe jwakukolanjikwa Babiloni Jwamkulungwa, ali likuga lyalikutenda yindu yakwe pacilambo cosope capasi. Lyeleli lili likuga lya dini syosope syawunami, ngaŵaga likuga lya ndale kapena lya malonda. Kwende tulole ndime sine sya m’buku ja Ciunukuko syasikusimicisya kuti likugali lili lya dini syosope syawunami.

Likuga mpaka liŵe lya ndale, lya malonda kapenasoni lya dini. Nambo jwamkongwe jwakolanjikwa kuti Babiloni Jwamkulungwaju nganaŵa likuga lya ndale, ligongo lyakuti Maloŵe ga Mlungu gakusasala kuti “ayimwene wosope ŵa pacilambo capasi,” kapena kuti ŵandale, “ŵatendaga nawo cikululu.” Kutenda cikululu kweleku kukugopolela mkamulano watesile ni ŵakulamulila ŵa pacilambo cosope, ni ligongo lyakwe akumsala kuti ali “jwamkongwe jwakulijesya.”—Ciunukuko 17:1, 2; Yakobo 4:4.

Babiloni Jwamkulungwa ngakomboleka kuŵa likuga lya ŵamalonda ligongo lyakuti “ŵandu ŵakusuma ni kusumisya malonda ŵapacilambo cosope capasi,” ŵakwimila likuga lya ŵa malonda, tacim’lilila pacacimjonanga jwamkongweju. Konjecesya pelepa, ayimwene, soni ŵandu ŵakusuma ni kusumisya malonda “tacijima kwakutalicila” ni kum’lolaga Babiloni Jwamkulungwa. (Ciunukuko 18:3, 9, 10, 15-17) M’yoyo, yili yakupikanika kusala kuti Babiloni Jwamkulungwa nganaŵa likuga lya ndale kapena lya malonda, nambo lili likuga lya dini syosope syawunami.

Mpaka tusimicisyesoni kuti Babiloni Jwamkulungwa ali likuga lya dini syosope syawunami, ligongo Baibulo jikusasala kuti jwalakwe akusalambusya ŵandu ŵapacilambo capasi ni “cisango cawunami.” (Ciunukuko 18:23) Ligongo lyakuti yacisango yosope yikusatyocela ku misimu jakusakala, yili yangasimonjesya kuti Baibulo jikusasala kuti Babiloni Jwamkulungwaju ali “malo  gakutamamo misimu jakusakala.” (Ciunukuko 18:2; Deuteronomo 18:10-12) Likuga lya dini syosope syawunamili likusatendela ngalwe dini jisyesyene, mwakwalagasya “ŵakulocesya,” soni “ŵandu ŵa Mlungu.” (Ciunukuko 18:24) Kusala yisyene, Babiloni Jwamkulungwa akusajiŵenga mnope dini jisyesyene mwakuti akusajitendela ngalwe mnope, soni kwawulaga kwene ŵandu ‘ŵakutendela umboni lina lya Yesu.’ (Ciunukuko 17:6) M’yoyo, yikuwonecela cile kuti jwamkongweju, Babiloni Jwamkulungwa, akwimila likuga lya dini syosope syawunami, syasili dini syosope syasikusamsisyaga Yehofa Mlungu.