U LIBROI Apocalipsiseʼ ku taasik tʼaanoʼob maʼ unaj u naʼataʼal jach jeʼex u yaʼalikoʼ. Jeʼex tu capítulo 17, ku tʼaan tiʼ utúul x-kʼeban koʼolel tsʼíibtaʼan tu táan joʼol upʼéel kʼaabaʼ ku yaʼalik: «nojoch Babilonia». Ku yaʼalik xaneʼ le koʼolelaʼ ku kutal yóokʼol «máakoʼob» bey xan yóokʼol «múuchʼ kaajoʼob» (Apocalipsis 17:1, 5, 15). Lelaʼ ku yeʼesikeʼ le Nojoch Babiloniaoʼ maʼ jach utúul koʼoleliʼ, tumen utúul koʼoleleʼ maʼ tu páajtal u kutal tu yóokʼol máakoʼob mix xan tu yóokʼol múuchʼ kaajoʼob. Wa maʼ utúul koʼoleleʼ, ¿baʼax túuniʼ?

Apocalipsis 17:18 ku yaʼalikeʼ le koʼolelaʼ upʼéel «nojoch kaaj yaan [u páajtalil] tu yóokʼol u [reyiloʼob] yóokʼol kaab». Ku yaʼalaʼaleʼ Babiloniaeʼ upʼéel «kaaj», lelaʼ ku beetik k-tuukul tiʼ yaʼab  máakoʼob. Ku yaʼalaʼal xaneʼ u reyiloʼob le yóokʼol kaabaʼ tiaʼanoʼob yáanal u kʼabeʼ. Lelaʼ ku yeʼesikeʼ le Nojoch Babiloniaoʼ upʼéel baʼal jach yaan u páajtalil teʼ tuláakal yóokʼol kaabaʼ. ¿Baʼax túuniʼ? Le Nojoch Babiloniaoʼ letiʼe tuláakal u religioniloʼob le yóokʼol kaab minaʼan u jaajil tiʼoboʼ. Koʼox ilik tekstos tiʼ u libroi Apocalipsis ku yeʼeskoʼob baʼaxten k-aʼalik lelaʼ.

Le Nojoch Babiloniaoʼ maʼ u gobiernoiloʼob yóokʼol kaabiʼ, tumen le Bibliaoʼ ku yaʼalikeʼ «[u reyiloʼob] yóokʼol kaabeʼ [wa u gobiernoiloʼob le yóokʼol kaabaʼ] tsʼoʼok u kuxtaloʼob ich núup kʼeban tu yéetel». U yaʼalaʼal le Nojoch Babilonia kuxaʼan ich kʼeban yéetel u reyiloʼob yóokʼol kaabeʼ u kʼáat u yaʼal ku naʼatkuba tu yéeteloʼob. Le beetik ku yaʼalaʼal utúul «[x-]kʼeban koʼolel» (Apocalipsis 17:1, 2; Santiago 4:4).

Le Bibliaoʼ ku yaʼalikeʼ ken xuʼulsaʼak le x-kʼeban koʼolelaʼ, yaan u yoʼtaʼal tumen «u j-konoliloʼob yóokʼol kaab». Lelaʼ ku yeʼesikeʼ le Nojoch Babiloniaoʼ maʼ u comercioiloʼob yóokʼol kaabiʼ. Le Biblia xanoʼ ku yaʼalikeʼ le reyoʼob yéetel le j-koonoloʼoboʼ «yaan u pʼáataloʼob náachil» u chaʼantoʼob ken xuʼulsaʼak (Apocalipsis 18:3, 9, 10, 15-17). Le beetik k-aʼalikeʼ le Nojoch Babiloniaoʼ maʼ u gobiernoiloʼob mix u comercioiloʼob yóokʼol kaabiʼ, u religioniloʼob le yóokʼol kaabaʼ.

Uláakʼ baʼax eʼesik le Nojoch Babilonia u religioniloʼob le yóokʼol kaabaʼ letiʼ lelaʼ: ku yaʼalaʼal táan u tusik tuláakal kaajoʼob yéetel u «pulyaʼajoʼob» (Apocalipsis 18:23). Tuláakal pulyaʼajileʼ yaan u yil yéetel creenciaʼob bey xan yéetel kʼaakʼas pixanoʼob. Le beetik le Bibliaoʼ ku yaʼalikeʼ le Nojoch Babiloniaoʼ «u kajtalil u kʼaasilbaʼaloʼob» (Apocalipsis 18:2; Deuteronomio 18:10-12). Ku yaʼalaʼal xaneʼ le Nojoch Babiloniaoʼ jach u tsʼaamuba tu contra le adoración kʼamaʼan tumen Diosoʼ, tumen ku chʼaʼapachtik le profetaʼob yéetel le máaxoʼob santoʼoboʼ (Apocalipsis 18:24). Jach táaj u pʼekmaj le adoración kʼamaʼan tumen Diosoʼ, le oʼolal ku sen chʼaʼapachtik yéetel ku kíimsik le máaxoʼob ku tʼaanoʼob tu kʼaabaʼ Jesusoʼ (Apocalipsis 17:6). Tuláakal lelaʼ ku yeʼesikeʼ le Nojoch Babiloniaoʼ letiʼe tuláakal u religioniloʼob le yóokʼol kaab minaʼan u jaajil tiʼoboʼ, tuʼux táakaʼan tak le jach u tsʼaamubaʼob tu contra u adoración Jéeobaoʼ.