YESU bangera don min na, Bibulu ma o don tigitigi fɔ. Nka, a bɛ kun ɲɛnama di an ma walisa k’a jira ko a ma bange Desanburukalo la.

Yesu bangera san kalo min na Bɛtilɛhɛm dugu la, an k’an miiri o kalo waati cogoya la. Yahutuw ka Kisleu kalo la (n’o bɛ bɛn Nowanburukalo ka taa se Desanburukalo ma) o tun ye nɛnɛ ani sanji kalo ye. Tebɛt kalo tun bɛ tugu o la (Desanburukalo ka taa se Zanwuyekalo ma). O san waati nɛnɛ hakɛ ka bon fo tuma dɔw la gilasi hakɛ tun bɛ yɛlɛ kosɛbɛ. Bibulu bɛ min fɔ o waati cogoya ko la, an ka o lajɛ.

Esdrasi, n’o ye Bibulu kitabu sɛbɛnna dɔ ye, o y’a jira tiɲɛ na ko nɛnɛ ani sanji bɛ na Kisleu kalo la. A kɛlen k’a fɔ ko jamakulu dɔ y’u lajɛ Jerusalɛm, “o kɛra san kalo kɔnɔntɔnnan [kisleu] tile mugannan don”, Esdrasi b’a fɔ ko o mɔgɔw tun bɛ “yɛrɛyɛrɛ . . . sanji kosɔn.” O san waati cogoya la, jamakulu lajɛlen yɛrɛ y’a fɔ ko: “Sanji ka bon, mɔgɔw tɛ se ka u  jɔ kɛnɛma.” (Esdrasi 10:9, 13; Jeremi 36:22) An b’a famu kun min na o yɔrɔ bagangɛnnaw tun bɛ fɛɛrɛ tigɛ walasa u n’u ka baganw kana to kɛnɛma sufɛ, Desanburukalo masurun na.

Nka, Bibulu b’a fɔ ko Yesu bangera su min na, sagagɛnnaw tun bɛ kungo kɔnɔ ka u ka saga kuluw kɔlɔsi. O la sa, Luka n’o ye Bibulu kitabu sɛbɛnna dɔ ye, o y’a jira ko o waati la, sagagɛnnaw tun “bɛ si ɲɛ na kungo kɔnɔ ka u ka sagaw kɔlɔsi” Bɛtilehɛm dugu kɛrɛfɛ. (Luka 2:8-12) I y’a kɔlɔsi ko sagagɛnnaw tun bɛ kungo kɔnɔ o waati la; u tun tɛ bɔ tile fɛ dɔrɔn. U ka saga kuluw tun bɛ kɛnɛmana na sufɛ. Ɲɛfɔli minnu kɛra ko u tun bɛ kungo kɔnɔ, yala nɛnɛ ani sanji min bɛ kɛ Desanburukalo la, olu ni o ɲɛfɔli bɛ bɛn ɲɔgɔn ma wa? Ayi, u tɛ bɛn ɲɔgɔn ma. Bawo, ko minnu kɛra Yesu ka bangeli la, olu b’a jira ko a ma bange Desanburukalo la. *

Yesu sara tuma min na, Ala ka Kuma b’o waati tigitigi fɔ k’a jɛya. Nka a bangera don min na, Bibulu bɛ kunnafoni dɔɔnin dɔrɔn de di o kan. O b’an hakili jigin Masakɛ Solomani ka kuma dɔ la ko: “Tɔgɔ ɲuman ka fisa ni tulu suma duman sɔngɔ gɛlɛn ye. Mɔgɔ sa don ka fisa ni a bangedon ye.” (Waajulikɛla 7:1) Ikomi Bibulu bɛ dalilu walawalalen caman di Yesu ka cidenyabaara ani a ka saya ko la, o la sa, a tɛ bali an na ko Yesu bangera waati min na, Bibulu ma kunnafoni walawalalenw di o kan.