MBIMBILIYA kuyishi kutulweza tangwa lize Yesu asemukine. Alioze yinasolola ngwo Yesu kakasemukine ha kakweji wa Dezembro.

Tutalenu chize tungonde a mwaka apwa ku Mbeteleme, kuze Yesu asemukine. Kakweji wa A-Yunda Quisleu (Novembro/Dezembro) te kakweji wa chishika ni vula munji. Kakweji te wakusulaho Tebete (Dezembro/Janeiro). Te kakweji wa chishika ni mbundu yinji ha mwaka. Tutalenu chize Mbimbiliya yinambe hakutwala ku tungonde a ku mbonge yacho.

Ezera umwe mukwa-kusoneka Mbimbiliya kanasolola ngwo kakweji wa Quisleu te wa chishika ni vula munji. Ezera muze te hamba ngwo mbunga yalikungulwile mu Yerusaleme ha ‘kakweji wamuchilivwa [Quisleu], ha tangwa makumi aali a kakweji’, iye yamba nawa ngwo atu ‘achikimine . . . mumu ha vula munji.’ Ha mukunda wa kangonde wa mwaka wacho atu waze alikungulwile yamba ngwo: “Vula munji uliko, kutwahashile  kumana haze.” (Ezera 10:9, 13; Jeremia 36:22) Kashika, hi kukomoka ko ngwo tufunga a mu chifuchi chacho ha kakweji wa Dezembro te keshi kutwama haze ufuku ni kufunga mapanga jo!

Alioze Mbimbiliya yinambe ngwo muze Yesu asemukine, tufunga kapwile haze ha ufuku ni kufunga mapanga jo. Chochene, Luka kanasolola ngwo, ha mashimbu jacho, tufunga ‘te kanafungu mapanga jo haze ha ufuku,’ hakamuhi ni Mbeteleme. (Luka 2:8-12) Nyingika ngwo tufunga te kanatwame haze ha ufuku ni kufunga mapanga jo. Ayo te kanafungu mapanga jo ha ufuku. Kulita ni sango jino, shina tufunga te mahasa kutwama haze ni mapanga jo ha kakweji wa Dezembro wa chishika ni vula munji mu Mbeteleme? Ka. Kashika kulita ni tungonde waze apwileko muze Yesu asemukine kanasolola ngwo iye kakasemukine ha kakweji wa Dezembro. a

Liji lia Zambi linatulweze tangwa lize Yesu afwile, alioze kulishi kutulweza tangwa lize iye asemukine. Yino yinatwiwulula maliji a Mwanangana Solomone, ngwo: “Jina lipema liahiana yitumbo ya maji ya ndando yilemu, tangwa lia kufwa liahiana tangwa lia kusemuka.” (Chilumbununyi 7:1) Kashika, hi kukomoka ko hakumona ngwo Mbimbiliya yinasolola sango jinji hakutwala ku mulimo ni kufwa cha Yesu, alioze yinasolola sango jikehe hakutwala ku tangwa lia kusemuka chenyi