BIBILIA ndĩtwĩraga rĩrĩa Jesu aaciarirũo. No rĩrĩ, nĩĩtũheaga ihooto njiganu cia gũtũma tuuge atĩ Jesu ndaaciarirũo Dicemba.

Ta wĩcirie ũhoro wa rĩera ihinda-inĩ rĩu rĩa mwaka, kũu Bethilehemu kũrĩa Jesu aaciarĩirũo. Mweri wa Kĩyahudi wa Kislevu (ũrĩa ũringanĩte na Novemba/Dicemba) warĩ mweri wa heho na mbura. Mweri ũrĩa warũmagĩrĩra nĩ Tebethi (Dicemba/Janũarĩ). Nĩrĩo gwakoragwo na heho mũno thĩinĩ wa mwaka, na rĩmwe nĩ gwakoragwo na tharunji matũũra ma irĩma-inĩ. Reke tuone ũrĩa Bibilia ĩtwĩraga wĩgiĩ rĩera rĩa kũndũ kũu Bethilehemu yarĩ.

Mwandĩki wa Bibilia wetagwo Ezara onanagia atĩ Kislevu warĩ mweri woĩkaine wĩ heho na mbura. Thutha wa kuuga atĩ andũ nĩ moonganĩte thĩinĩ wa Jerusalemu “mũthenya wa mĩrongo ĩĩrĩ wa mweri wa kenda [Kislevu],” Ezara oigĩte atĩ andũ nĩ ‘mainainaga nĩũndũ wa mbura ĩrĩa yoiraga nene.’ Ha ũhoro wa rĩera hĩndĩ ĩo ya mwaka-rĩ, andũ acio moonganĩte o moigire ũũ: “Nĩ ihinda rĩa mbura nene, na tũtingĩhota  kũrũgama nja handũ hatarĩ hagite.” (Ezara 10:9, 13; Jeremia 36:22) Ti ũndũ wa kũgegania atĩ arĩithi arĩa maaikaraga gũkuhĩ na Bethilehemu maatigagĩrĩra atĩ o ene o na ũhiũ wao, matiakoragwo nja ũtukũ mahinda-inĩ ma Dicemba!

No rĩrĩ, Bibilia yugaga atĩ arĩithi maarĩ nja makĩrĩithia ũtukũ ũrĩa Jesu aaciarirũo. Mwandĩki wa Bibilia Luka onanagia atĩ hĩndĩ ĩo-rĩ, arĩithi “maaikarĩte werũ-inĩ, magaikaragia ũhiũ wao ũtukũ,” hakuhĩ na Bethilehemu. (Luka 2:8-12) Rora wone atĩ arĩithi maaikarĩte werũ-inĩ, no to kũũrũra tu moorũũraga mũthenya. Maarĩ na ũhiũ wao nja ũtukũ. Gũikara nja ũguo no kũhoteke kwĩ na heho na mbura ũguo kũu Bethilehemu mweri wa Dicemba? Aca, gũtingĩhoteka. Kwoguo ũrĩa gwatariĩ hĩndĩ ya gũciarũo kwa Jesu kuonanagia atĩ ndaaciarirũo Dicemba. *

Kiugo kĩa Ngai nĩ gĩtwĩraga wega rĩrĩa Jesu aakuire, no gĩtitaarĩirie mũno ũhoro wa rĩrĩa aaciarirũo. Ũndũ ũcio ũtũririkanagia ciugo cia Mũthamaki Suleimani: “Nĩ kaba ngumo njega gũkĩra maguta ma goro marĩa manungaga wega: o na mũthenya wa gũkua, gũkĩra mũthenya wa gũciarũo.” (Kohelethu 7:1) Kwoguo ti ũndũ wa kũgegania atĩ Bibilia ĩheanĩte maũndũ maingĩ megiĩ ũtungata wa Jesu na gĩkuũ gĩake, no ĩkaheana maũndũ manyinyi megiĩ gũciarũo gwake.