ಯೇಸು ಯಾವಾಗ ಹುಟ್ಟಿದನೆಂದು ಬೈಬಲು ತಿಳಿಸುವುದಿಲ್ಲ. ಆದರೂ ಅವನು ಡಿಸೆಂಬರ್‌ನಲ್ಲಿ ಜನಿಸಲಿಲ್ಲವೆಂದು ತೀರ್ಮಾನಿಸಲು ಅದು ನಮಗೆ ದೃಢವಾದ ಕಾರಣವನ್ನು ಕೊಡುತ್ತದೆ.

ಯೇಸು ಹುಟ್ಟಿದ ಬೇತ್ಲೆಹೇಮಿನಲ್ಲಿ ವರುಷದ ಆ ಸಮಯದಲ್ಲಿದ್ದ ಹವಾಮಾನದ ಪರಿಸ್ಥಿತಿಗಳನ್ನು ಪರಿಗಣಿಸಿರಿ. ಯೆಹೂದಿ ತಿಂಗಳಾದ ಕಿಸ್ಲೆವ್‌ (ನವೆಂಬರ್‌/ಡಿಸೆಂಬರ್‌ಗೆ ಸರಿಹೊಂದುತ್ತದೆ) ಚಳಿ ಮತ್ತು ಮಳೆಯ ತಿಂಗಳಾಗಿತ್ತು. ಇದರ ನಂತರದ ತಿಂಗಳು ಟೆಬೆತ್‌ (ಡಿಸೆಂಬರ್‌/ಜನವರಿ) ಆಗಿತ್ತು. ಆ ತಿಂಗಳು ವರುಷದಲ್ಲಿಯೇ ಅತಿ ಕನಿಷ್ಠ ತಾಪಮಾನವಿದ್ದ ತಿಂಗಳಾಗಿದ್ದು, ಪರ್ವತ ಪ್ರದೇಶಗಳಲ್ಲಿ ಆಗಾಗ ಹಿಮಬೀಳುತ್ತಿತ್ತು. ಆ ಪ್ರದೇಶದ ಹವಾಮಾನದ ಕುರಿತು ಬೈಬಲ್‌ ಏನು ಹೇಳುತ್ತದೆಂದು ನೋಡೋಣ.

ಕಿಸ್ಲೆವ್‌ ತಿಂಗಳು ಚಳಿ ಮತ್ತು ಮಳೆಗೆ ಪ್ರಸಿದ್ಧವಾಗಿತ್ತೆಂಬುದನ್ನು ಬೈಬಲ್‌ ಲೇಖಕನಾದ ಎಜ್ರನು ತೋರಿಸುತ್ತಾನೆ. “ಒಂಭತ್ತನೆಯ ತಿಂಗಳಿನ [ಕಿಸ್ಲೆವ್‌] ಇಪ್ಪತ್ತನೆಯ ದಿನದಲ್ಲಿ” ಯೆರೂಸಲೇಮಿನಲ್ಲಿ ಜನರು ಕೂಡಿಬಂದಿದ್ದರು ಎಂದು ಹೇಳಿದ ಮೇಲೆ, ಅವರು ‘ದೊಡ್ಡ ಮಳೆಯ ದೆಸೆಯಿಂದ ನಡುಗುತ್ತಾ’ ಇದ್ದರೆಂದು ಎಜ್ರನು ವರದಿಮಾಡುತ್ತಾನೆ. ವರುಷದ ಆ ಸಮಯದಲ್ಲಿ ಹವಾಮಾನದ ಕುರಿತು ನೆರೆದುಬಂದಿದ್ದವರೇ ಹೇಳಿದ್ದು: “ಈಗ ಮಳೆಗಾಲ; ಹೊರಗೆ ನಿಲ್ಲುವದು ಅಸಾಧ್ಯ.” (ಎಜ್ರ 10:9, 13; ಯೆರೆಮೀಯ  36:22) ಆದಕಾರಣ, ಬೇತ್ಲೆಹೇಮಿನ ಸುತ್ತಲಿನ ಆ ಪ್ರದೇಶಗಳಲ್ಲಿ ವಾಸಿಸುತ್ತಿದ್ದ ಕುರುಬರು, ಡಿಸೆಂಬರ್‌ ಬಂದಾಗ ರಾತ್ರಿಕಾಲದಲ್ಲಿ ತಮ್ಮ ಮಂದೆಗಳೊಂದಿಗೆ ಹೊರಗಡೆ ಇರದಂತೆ ನೋಡಿಕೊಳ್ಳುತ್ತಾರೆಂಬದರಲ್ಲಿ ಆಶ್ಚರ್ಯವಿಲ್ಲ!

ಆದರೆ, ಯೇಸು ಹುಟ್ಟಿದ ರಾತ್ರಿಯಂದು ಕುರುಬರು ಹೊಲಗಳಲ್ಲಿ ತಮ್ಮ ಮಂದೆಗಳನ್ನು ಕಾಯುತ್ತಿದ್ದರೆಂದು ಬೈಬಲ್‌ ವರದಿಸುತ್ತದೆ. ವಾಸ್ತವದಲ್ಲಿ, ಆ ಸಮಯದಲ್ಲಿ ಬೇತ್ಲೆಹೇಮಿನ ಸಮೀಪದಲ್ಲಿ ಆ “ಕುರುಬರು ಹೊಲದಲ್ಲಿದ್ದುಕೊಂಡು [“ಹೊಲದಲ್ಲಿ ತಂಗಿದ್ದು,” NW] ರಾತ್ರಿಯಲ್ಲಿ ತಮ್ಮ ಕುರೀಹಿಂಡನ್ನು ಕಾಯುತ್ತ” ಇದ್ದರೆಂದು ಬೈಬಲ್‌ ಲೇಖಕನಾದ ಲೂಕನು ತೋರಿಸುತ್ತಾನೆ. (ಲೂಕ 2:8-12) ಆ ಕುರುಬರು ಹೊಲದಲ್ಲೇ ತಂಗಿದ್ದರು ಎಂಬುದನ್ನು ಗಮನಿಸಿರಿ, ಅವರು ಕೇವಲ ದಿನದ ಸಮಯದಲ್ಲಿ ಆಚೀಚೆ ನಡೆದಾಡುತ್ತಿರಲಿಲ್ಲ. ಅವರ ಹಿಂಡುಗಳು ರಾತ್ರಿಕಾಲದಲ್ಲಿ ಹೊಲದಲ್ಲಿದ್ದವು. ಹೊರಗಡೆ ಜೀವಿಸುವ ಈ ವರ್ಣನೆ, ಡಿಸೆಂಬರ್‌ನಲ್ಲಿ ಬೇತ್ಲೆಹೇಮಿನ ಚಳಿ ಮತ್ತು ಮಳೆಯ ಹವಾಮಾನಕ್ಕೆ ತಾಳೆಬೀಳುತ್ತದೆಯೆ? ಇಲ್ಲ. ಹೀಗೆ ಯೇಸುವಿನ ಜನನವನ್ನು ಆವರಿಸಿರುವ ಪರಿಸ್ಥಿತಿಗಳು ಅವನು ಡಿಸೆಂಬರ್‌ನಲ್ಲಿ ಹುಟ್ಟಲಿಲ್ಲವೆಂದು ಸೂಚಿಸುತ್ತವೆ. *

ಯೇಸು ಯಾವಾಗ ಮೃತಪಟ್ಟನೆಂದು ದೇವರ ವಾಕ್ಯವು ನಿಷ್ಕೃಷ್ಟವಾಗಿ ತಿಳಿಸುತ್ತದೆ. ಆದರೆ ಅವನು ಹುಟ್ಟಿದ್ದು ಯಾವಾಗ ಎಂಬ ವಿಷಯದಲ್ಲಿ ನೇರವಾದ ಸೂಚನೆಗಳು ತೀರ ಕಡಿಮೆ. ಇದು, “ಸುಗಂಧತೈಲಕ್ಕಿಂತ ಒಳ್ಳೆಯ ಹೆಸರು ಉತ್ತಮ; ಜನನದಿನಕ್ಕಿಂತ ಮರಣದಿನ ಮೇಲು” ಎಂಬ ರಾಜ ಸೊಲೊಮೋನನ ಮಾತುಗಳನ್ನು ಜ್ಞಾಪಕಕ್ಕೆ ತರುತ್ತದೆ. (ಪ್ರಸಂಗಿ 7:1) ಹಾಗಾದರೆ, ಬೈಬಲು ಯೇಸುವಿನ ಶುಶ್ರೂಷೆ ಮತ್ತು ಮರಣದ ವಿಷಯದಲ್ಲಿ ಅನೇಕ ವಿವರಗಳನ್ನು ಕೊಟ್ಟಿರುವುದಾದರೂ ಅವನ ಜನನದ ವಿಷಯದಲ್ಲಿ ಕೇವಲ ಕೆಲವೇ ವಿವರಗಳನ್ನು ಕೊಟ್ಟಿರುವುದರಲ್ಲಿ ಆಶ್ಚರ್ಯವೇನೂ ಇಲ್ಲ.