OMBIMBILIYA kaitupopila onalupi Jesus atyitwa. Mahi, itulekesa nawa okuti Jesus katyitilwe mohanyi ya Kayovo.

Tala oñgeni omuvo ukala mohanyi ya Kayovo ko Mbelei kuna kuatyitilwa Jesus. Ohanyi yo va Judeu Kisileu, kononthiki mbo hono, o pokati ka (Kuhuhu na Kayovo). Ohanyi oyo, kotyilongo tyo Mbelei oyombila, noutalala. Ohanyi ilandulako, ankho itiwa tebete. Kononthiki mbo hono, o pokati ka (Kayovo na Kupupu). Omuvo oo, kovilongo ovio kutalala unene, pamue kukala ongandyi. Tutalei etyi Ombimbiliya ipopia konthele yomuvo kovilongo ovio.

Omuhoneki wo Mbimbiliya Esdra walekesa okuti ohanyi ya Kisileu ankho iiwe nawa okuti omuvo wombila noutalala. Etyi Esdra apopia konthele yovanthu veliongiyile mo Jelusalei monthiki 20 yohanyi ya tyive [Kisileu], Esdra wati ovanthu ankho vekahi ‘nokuteketa . . . mokonda yombila ankho ikahi nokuloka unene.’ Ovanthu ovo ankho vokueliongiya vati: ‘Ou omuvo wombila katyitavela okukala pondye.’ (Esdra 10:9, 13; Jeremias  36:22) Otyo, tyilekesa okuti mohanyi oyo, kovilongo oko kutenda unene. Moluotyo, ovanthita motyilongo otyo, ankho kavapondola okukala mohika komaunthiki novipako viavo mohanyi oyo ya Kayovo.

Mahi, Ombimbiliya ipopia okuti ankho kuna ovanthita vekahi kononhambo, motyinthiki tyatyitwa Jesus. Omuhoneki wo Mbimbiliya Lukas, walekesa okuti pomuvo Jesus atyitwa, ankho kuna ovanthita ‘valala mohika nokuyunga ovipako viavo’ popepi no Mbelei. (Lucas 2:8-12) Hinangela okuti ovanthita ankho vakala mohika, kavakalisa vala komutenya otyo vakondoka keumbo. Ovanthita ovo ankho valala novipako viavo mohika kounthiki. Inkha tyali mohanyi ya Kayovo, okuti ovanthita ovo ñgeno vetyivila okulala-lala mohika novipako viavo, mohanyi youtalala nombila ko Mbelei? Au, ñgeno kavetyivilile. Otyo, tyilekesa okuti Jesus katyitilwe mohanyi ya Kayovo. a

Ondaka ya Huku itupopila nawa-nawa onalupi Jesus ankhia. Mahi, itutolela vala katutu konthele yonthiki atyitwa. Otyo tyituhinangelesa onondaka mbo Hamba Salomau mbati: ‘Enyina liakolela vali tyipona omulela upepa nawa, onthiki yokunkhia yapona vali onthiki yokutyitwa.’ (Eclesiastes 7:1) Etyi, otyo Ombimbiliya ipopila vali unene konthele yovilinga via Jesus nononkhia mbae. Mahi, ipopia vala katutu konthele yokutyitwa kuae.