Yesu Akazaarwa omu kw’Ikumi n’Ebiri?

BAIBULI terikutugambira obwire bwenyine obu Yesu yaazaarwa. Kwonka, neetuha enshonga ezirikutuhitsya aha kumanya ngu Yesu tarazairwe mu kw’Ikumi n’Ebiri.

Teekateeka aha ku embeera y’obwire yaabaire eri omu kw’Ikumi n’Ebiri omuri Betelehemu ei Yesu yaazaariirwe. Okwezi okurikwetwa Chislev omuri Buyudaaya (ahagati y’okw’Ikumi na Kumwe n’okw’Ikumi n’Ebiri omuri karenda yaitu) kukaba kuri okwezi okw’obufuki n’enjura nyingi. Okwezi okwabaire nikukukurata kukaba nikwetwa Tebeth (ahagati y’okw’Ikumi n’Ebiri n’okw’Okubanza omuri karenda yaitu). Okwezi oku nikwo kwabaire kubamu obufuki bwingi omu mwaka, nangwa n’obumwe hakaba habaho n’orubaare omu bibungo. Ka tureebe eki Baibuli erikutugambira aha bikwatiraine n’embeera y’obwire ey’omu kicweka ekyo.

Ezera omuhandiiki wa Baibuli naayoreka ngu Chislev buzima kukaba kuri okwezi kw’obufuki n’enjura nyingi. Bwanyima y’okworeka ngu abantu nyamwingi bakaba beeteeraniire Yerusaalemu aha kiro kya makumi abiri eky’okwezi “Chislev, okwezi okwa mwenda omuri karenda y’Abayudaaya, Ezera naayoreka ngu abantu bakaba “nibatetema . . . ahabw’enjura nyingi.” Ebirikukwata aha mbeera y’obwire obwo omu mwaka, abantu abo abaabaire bateeraniire  hamwe bakagira bati: “N’obunaku bw’enjura nyingi; titurikubaasa kwemerera aheeru.” (Ezera 10:9, 13; Yeremia 36:22) Egi niyo nshonga ahabw’enki abariisa abaabaire nibatuura omu kicweka ekyo ekihereire Betelehemu baabaire bahamiza ngu okw’Ikumi n’Ebiri tikwabashanga bakiri omu ishwa bo hamwe n’amasyo gaabo!

Kwonka Baibuli yo neegira ngu abariisa bakaba bari omu ishwa nibarinda amasyo gaabo omu kiro eki Yesu yaazaariirweho. Luka, Omuhandiiki wa Baibuli naayoreka ngu omu bwire obwo, abariisa ‘bakaba nibatuura omu ishwa barikurinda amasyo gaabo nyekiro’ haihi na Betelehemu. (Luka 2:8-12) Yetegyereze ngu abariisa buzima bakaba nibatuura omu ishwa, beitu kutari kugyendagyenda kwonka aheeru nyomushana. Bakaba barinzire amasyo gaabo omu ishwa nyekiro. Mbwenu shi okushoborora okwo okurikugira ngu abariisa bakaba bari omu ishwa nikwikirizana n’embeera y’obufuki n’enjura nyingi eby’omuri Betelehemu omu kwezi kw’Ikumi n’Ebiri? Ngaaha, tibirikwikirizana. N’ahabw’ekyo ebyabaire biriho obu Yesu yaazaarwa nibyoreka ngu tarazairwe mu kw’Ikumi n’Ebiri. *

Ekigambo kya Ruhanga nikitumanyisa obwire bwenyine obu Yesu yaafeereireho, beitu kwonka nikigamba bikye ebirikworeka obu Yesu yaazaarwa. Eki nikitwijutsya ebigambo by’Omugabe Sulemaani obu yaagira ati: “Okugira eiziina rirungi nikikira amajuta g’omugaju ag’obuguzi bwingi; eizooba ery’okufeeraho nirikira ery’okuzaarirwaho.” (Omubuurizi 7:1) N’ahabw’ekyo, tikirikutangaaza okureeba ngu Baibuli neegamba bingi ebirikukwata aha buheereza n’okufa kwa Yesu kwonka haza egamba bikye aha bwire obu yaazaariirweho.

[Obugambo obw’Ahansi]

[Ekishushani ekiri aha rupapura 221]

Obu Yesu yaazaarwa, abariisa bakaba bari hamwe n’amasyo gaabo omu ishwa nyekiro