ЙЕСО ЧЫРЫСТИ бӕлвырдӕй кӕд райгуырд, уый Библийы фыст нӕй. Фӕлӕ дзы уӕддӕр базонӕн ис, декабры кӕй нӕ райгуырд.

Ӕркӕсӕм-ма, уыцы афон-иу Йесойы райгуырӕн горӕт Вифлеемы боныхъӕд цавӕр уыд, уымӕ. Дзуттӕгты къӕлиндармӕ гӕсгӕ-иу кислевы мӕйы (ома ноябрь-декабры) уыд уазал  ӕмӕ къӕвдаджын рӕстӕг. Уый фӕстӕ та-иу уыди теветы мӕй (декабрь-январь). Афӕдзы мидӕг-иу уымӕй уазалдӕр рӕстӕг никуы уыди, хӕхты-иу мит дӕр ӕруарыд. Ӕркӕсӕм, уыцы ран ӕрдзыхъӕд цавӕр уыд, уый тыххӕй Библийы цы фыст ис, уымӕ.

Кислевы мӕй-иу уазал ӕмӕ къӕвдаджын кӕй уыди, уый бӕлвырд ӕвдисы, Библи чи фыста, уыдонӕй сӕ иу, Ездрӕ. Йӕ чиныджы Ездрӕ ныффыста, «фарӕстӕм мӕйы», ома кислевы мӕйы, адӕм Иерусалимы кӕй ӕрӕмбырд сты, уый тыххӕй. Ӕмӕ дарддӕр загъта, зӕгъгӕ, «къӕвда кӕй уарыд, уый тыххӕй» адӕм «зыр-зыр кодтой». Уыцы рӕстӕг боныхъӕд цавӕр уыди, уый бӕрӕг у адӕмӕн сӕхи ныхӕстӕй дӕр: «Ныртӕккӕ... къӕвдаджын рӕстӕг у, ӕмӕ ӕддейӕ лӕууӕн нӕй» (Ездрӕ 10:9, 13; Йереми 36:22). Уӕдӕ ма декабры мӕйы фыййӕуттӕ дӕр сӕ дзугтимӕ ӕхсӕвы быдыры кӕцӕй уыдаиккой!

Фӕлӕ, Библийы Лука куыд ныффыста, афтӕмӕй, Йесо куы райгуырд, уыцы ӕхсӕв фыййӕуттӕ та сӕ дзугтимӕ быдыры уыдысты. Уыдон Вифлееммӕ хӕстӕг «быдыры цардысты» ӕмӕ «ӕхсӕвыгон хъахъхъӕдтой сӕ дзугтӕ» (Лукайы 2:8–12). Бафиппайдтай йӕ, сӕ фосимӕ быдыры ӕрмӕст  боныгон кӕй нӕ уыдысты, фӕлӕ цӕргӕ дӕр уым кӕй кодтой? Ӕхсӕв дӕр сӕ фос быдыры дардтой. Цымӕ уый гӕнӕн ис, ӕмӕ декабры уыцы уазал ӕмӕ къӕвдаджын рӕстӕг фыййӕуттӕ сӕ фосимӕ ӕхсӕв ӕддейӕ уыдаиккой? Кӕцӕй! Уӕдӕ бӕрӕг у, Йесо декабры кӕй нӕ райгуырд *.

Йесо кӕд райгуырд, уый Хуыцауы Ныхасы комкоммӕ фыст нӕй. Кӕд амард, уый тыххӕй та дзы бӕлвырдӕй ис фыст. Ӕмӕ нын уый нӕ зӕрдыл лӕууын кӕны паддзах Соломоны ныхӕстӕ: «Хорз ном хуыздӕр у зынаргъ сойӕ, ӕмӕ адӕймагӕн йӕ мӕлӕты бон хуыздӕр у йӕ райгуырды бонӕй» (Екклесиаст 7:1). Ацы ныхӕсты фӕрцы йӕ хуыздӕр ӕмбарӕм, Библийы Йесойӕн йӕ райгуырды тыххӕй афтӕ гыццыл цӕмӕн ис фыст ӕмӕ дзы йӕ лӕггад ӕмӕ йӕ мӕлӕты хабӕрттӕ та афтӕ бӕстон фыст цӕмӕн ӕрцыдысты, уый.