BIJBEL no ta bisa nos ki tempo Hesus a nace. Sinembargo, e ta duna nos motibo valido pa conclui cu su nacemento no a tuma luga na december.

Considera con weer ta den e temporada ei di aña na Betlehem, caminda Hesus a nace. E luna Hudiu di kisleu (cu ta coresponde cu november/december) tawata un luna cu ta haci friu y tin hopi awasero. E luna despues di esei tawata tebet (december/januari), y e tawatin e temperatura di mas friu di aña. De bes en cuando asta sneu tawata cai den e partinan cu tin sero. Laga nos mira kico Bijbel ta conta nos di e clima di e region ei.

E escritor biblico Esdras ta mustra cu kisleu tawata en berdad un luna conoci pa frialdad y hopi awasero. Despues di declara cu un multitud a reuni na Herusalem den “e di nuebe luna riba e di binti dia di e luna”, Esdras ta informa cu e pueblo tawata “temblando . . . pa motibo di e awasero pisa.” Relaciona cu e weer den e tempo ei di aña, e pueblo reuni mes a bisa:  “Ta tempo di awasero, asina cu nos no por para pafo.” (Esdras 10:9, 13; Yeremias 36:22) Nada straño anto cu wardadonan di carne cu a biba den e parti ei di mundo tawata percura pa nan y nan tou no ta pafo mas ora december yega.

Sinembargo, Bijbel ta informa cu riba e anochi cu Hesus a nace, wardado di carne tawata den sabana ta atende nan tou. De echo, e escritor biblico Lucas ta mustra cu e tempo ei “tawatin wardadonan cu tawata keda den e sabananan, y cu anochi tawata tene warda riba nan tou di carne” serca di Betlehem. (Lucas 2:8-12) Tuma nota cu e wardadonan tawata keda den sabana, nan no a djis bai cana pafo un rato durante dia. Nan tawatin nan tou den sabana anochi. E descripcion di keda den sabana ta cuadra cu e frialdad y hopi awasero cu tin na Betlehem den december? No, e no ta cuadra. Pues anto, e circunstancianan rond di e nacemento di Hesus ta indica cu e no a nace na december. *

E Palabra di Dios ta conta nos precis ki dia Hesus a muri, pero e ta duna masha tiki indicacion direct encuanto e dia cu el a nace. Esaki ta laga nos corda riba e palabranan di Rei Salomon: “Un bon nomber ta mihor cu un bon enguente, y e dia di un hende su morto ta mihor cu e dia di su nacemento.” (Eclesiastes 7:1) No ta un sorpresa anto cu Bijbel ta duna hopi detaye tocante Hesus su ministerio y morto pero tiki detaye tocante e dia di su nacemento.