A BIBLIA a diak louchais el kmo a Jesus ngmilechell er a oingerang. Me nguaisei, engdi ngmeskid a ungil uchul me a Jesus a dimlak lemechell er a December.

 Ka di molatk er tiang. Ngar er a beluu er a Bethlehem el lemlechell er ngii a Jesus, e a buil el Chislev el ngar er a kalender er a Rechijudea (el ngii a November el mo December er a kalender er chelecha el taem) a taem er a blsechel a kelekolt e dirrek el di mesesechull. E a buil el Tebeth (December el mo January er a kalender er chelecha el taem) el uleak uriul er ngii, a kot el mle mekelekolt el taem er a chelsel a rak, el lebebil er a taem e ngruebet a yuki er aike el mekedidai el basio. Ka me bo domes aike el lolekoi a Biblia el kirel tiang.

A Esra el ta er a milluches er a Biblia a ouchais el kmo, tia el buil el Chislev a mera el mle taem el mekelekolt a beluu e mesesechull. Ngmesaod er sel taem el blo el kldibel a rechad er a Jerusalem er a “lluich el kebesengil a ongetiu el buil [Chislev],” el kmo, a “re bek el chad el mlar sei a ulemritel” e le ngkmal “mle klou a chull.” Me nguaisei, tirke el mle kldibel a dirrek el di mle tir el melekoi el kmo: “Kmal klou a chull, me ng diak el sebecham el dechor er tial di chelelluut el ua itiang.” (Esra 10:9, 13; Jeremia 36:22) Sei a uchul me a remengkerengel a sib a mle kerekikl me ngdiak a ta er tir me a chermir el ngar rikl a leklebesei sel bo el December.

 Me nguaisei, engdi Biblia a melekoi el kmo sel kesus er a lemechell a Jesus e a remengkerengel a sib a mla er a ked el mengkar a delebechel el sib. A Lukas el ta er a remilluches er a Biblia a melekoi el kirel tia el taem er a cherellel a Jesus el kmo, te mla er ngii a remengkar a sib el mle kmeed er a Bethlehem el “mlar a ked er a klebesei el mengkar a delebechel el sib.” (Lukas 2:8-12) Me tirka el chad a mle kiei er a ked a leklebesei el mengkar a chermir el sib. Ngsebechel a chad el mla er a Bethlehem el kiei a ked a leklebesei er aike el buil er a December el mle mekelekolt e mesesechull? Ngdiak. Me a tekoi el dilubech er sel kesus er a lemechell a Jesus a ochotii el kmo, ngdimlak el lemechell er a December. *

A Tekingel a Dios a ouchais er kid er a sils el lemlad er ngii a Jesus, engdi ngdiak a komakai el omesodel er sel sils el lemlechell er ngii. Tia mekltkid er a tekingel a King Salomon el kmo: “A ungil chisel a chad a kuk ungil er a mekreos el chilt, me sel sils el le mad er ngii a kuk ungil er sel sils el le mlechell er ngii.” (Olisechakl 7:1) Me ngdiak el mechas a rengud er a Biblia a lak a kmal omesodel el kirel a cherellel a Jesus e ngbai komakai a omesodel el kirel a omesiungel me a kodellel.