BIBLIA ka kontanu kal tempu ku Jesus padidu. Ma, i danu provas ku ta mostranu kuma, i ka padidu na mis di Dizembru.

Pensa na kondisons di klima na kil piriudu di anu, na reẑion di Belen, nunde ki Jesus padidu. Mis Judeu, Kisleu (ku ta kuruspundi Novembru/Dizembru) i un mis di friu ku cuba forti. Mis dipus i Tebeti (Dizembru/Janeru). I tempu ki ta ten mas friu na anu, nevis ta dati i kai na montañas. No jubi ke ki Biblia falanu aserka di klima na reẑion nunde ki Belen staba.

Skirbidur di Biblia, Esdras, mostra kuma, na bardadi, Kisleu seduba un mis di friu ku cuba. Dipus di fala ki multidon junta na Jerusalen “na dia 20 di nonu mis [Kisleu],” Esdras fala ki jintis, na “tirmiba . . . pabia di cuba ku na kaiba ku forsa.” Aserka di kondison di klima na ki piriudu di anu, povu ku juntaba fala: “No sta na tempu di cuba; no ka pudi fika li fora.”  (Esdras 10:9, 13; Jeremias 36:22) I ka di adimira di kuma bakiaduris ku ta viviba na ki zona ta kuida pa ka sai fora ku se limarias di noiti na mis di Dizembru!

Ma, Biblia fala ki, bakiaduris staba na matu na bisia se limarias na noiti ki Jesus padidu. Na bardadi, skirbidur di Biblia, Lukas, mostra kuma, na ki tempu, bakiaduris “na bisiaba se karnel di noti” pertu di Belen. (Lukas 2:8-12) Nota ki bakiaduris staba na bisia se karnelis, e ka staba so na yanda di dia. E staba ku se limarias na matu di noiti. Sera ki es nformason aserka di bisia limarias ta kombina ku tempu di friu ku cuba na Belen, na mis di Dizembru? Nau, i ka kombina. Asin, sirkunstansias na tempu ku Jesus padidu ta mostra kuma i ka padidu na mis di Dizembru. Ku serteza i padidu serka di 1 di Otubru. *

Palabra di Deus kontanu data izatu ku Jesus muri, ma i danu puku indikason aserka di kal dia izatu ki padidu. Es ta lembrantanu palabras di Rei Salomon: “Bon nomi i minjor di ki purfumu mas bonitu; dia di mortu i minjor di ki dia ku algin padidu.” (Eklesiastis 7:1) E ku manda i ka di adimira ki Biblia da manga di nformasons aserka di obra di Jesus ku si mortu, ma i da puku nformason aserka di tempu ki padidu.