JESÚS ima punlla huacharishcataca Bibliaca mana huillanchu. Shinapish diciembre quillapi Jesús mana huacharishcataca allimi entendichin.

Jesús huacharishca Belén pueblopica ¿diciembre punllacunaca ima shinataj can? Judiocunapaj calendariopica kislev quillami tiyan, ñucanchij calendariocunapica noviembre chaupi quillamanta, diciembre chaupi quillacamami can. Chai punllacunaca chiri punllacuna, tamya punllacunami can. Kislev qˈuipaca tebet quillami callarin, ñucanchij calendariocunapica diciembre chaupi quillamanta, enero chaupi quillacamami can. Chai punllacunaca ashtahuan chiri chirimi can, huaquin urcucunapica rasupishmi urman. Chai punllacunapi Belén llajtapi ima shina cashcata Bibliapi ricushun.

Bibliata quillcaj Esdrasca kislev quillapi chiri punllacuna, tamya punllacuna cashcatami parlarca. Jerusalenpica ‘huatapaj iscun quilla [kislev quilla tucujpi] ishqui chunga punllapimi’ achca gentecuna tandanacurca. Chai gentecunaca  ‘tamyacushcamantami chujchushpa tiyacurcacuna’. Paicunaca: “Tamya punllacunapishmari. Cai ñanllapica mana cai tucunchijchu” nircami ninmi (Esdras 10:9, 13; Jeremías 36:22). Shinashpaca kislev o diciembre quilla ña chayamujpica, michij runacunaca ovejacunandij ama canllapi pacaringapajmi ovejacunata tandachishpa huaquichij carca.

Shinapish Jesús huacharishca tutapica, michij runacunaca paicunapaj ovejacunatami canllapi cuidacurcacuna nishpami Bibliaca yachachin. Jesusta catij Lucasca, Belén ‘cˈuchulla llajtacunapica michijcunami tiyarca. Paicunaca ovejacunatami tuta chapashpa cuidacurcacuna’ ninmi (Lucas 2:8-12). Cai versocunapi nishca shinaca, ovejacunata michijcunaca mana punllallapichu cuidajcuna carca, tutapishmi chapashpa cuidajcuna carca. Diciembre quillapi Belén llajtapi chiri punllacuna, tamya punllacuna cajpica ¿ovejacunata michijcunaca tutapi cuidacunmanchu carca? Mana. Shinashpaca, Jesusca mana diciembre quillapi huacharircachu. *

Bibliapica Jesús ima punlla huañushcataca tucuitami yachachin. Shinapish Jesús huacharishcamantaca ashallatami parlan. Rey Salomonca: “Huañui punllaca huachari punllata yalli allimi” nircami (Eclesiastés 7:1). Chaimantami Bibliapica Jesús imata huillashcata, ima shina huañushcatapish parlan. Jesús huacharishcamantaca mana achcata parlanchu.