QULLAAWU MAXAAFI Yesuusi ilamino barra dikulanno. Ikkeennano, Yesuusi ilaminohu Sadaasu aganira diˈˈikkino yineemmo gede assitannonke taje kulannonke.

Yesuusi ilamino katamira yaano Beeteleemete Sadaasu aganira ayyare hiittootero hanni laˈno. Kaaseelu yinannihu Yihudootu agani (xaa yannara Bocaasa/Sadaasa yinannihu) qorru uwannohonna xeenu batiˈranno aganaati. Hakkiinni aane noo agani Tebeeti (Sadaasa/Arfaasa) yinanniho. Diru giddo kuni agani lowo geeshsha qiidadoho; qoleno ilaallate qooxora saˈe saˈe kaade ubbanno aganaati. Qullaawu Maxaafi Beeteleemete qooxeessira ayyarete gari hiittooho yaannoro hanni laˈno.

Qullaawu Maxaafi borreessaanchi Izira, Kaaseelu yinanni agani qiidadonna xeenu batiˈrannoha ikkinota xawisino. Izira “honsikki aganira [yaano Kaaseelu aganira] lemiikki barra” lowo manni Yerusaalamete gamba yiinota kuli gedensaanni, hakku manni ‘xeenu batinynyinni . . . huxirinota’ xawisino. Hatte yannara nooha ayyarete gara lainohunni gamba yiino manni umisi togo yiino: “Tini yanna xeenu batiˈrinote; konnira gobba uurra didandiineemmo.” (Izira 10:9, 13; Ermiyaasi 36:22) Sadaasu aganira Beeteleemete qooxeessira noo allaalaasine saadansa hawarro yannantenni minira eessidhannoti mittore dihuluullissanno!

Ikkollana Yesuusi ilami hashsha allaalaasine saadansa gobba allaaˈlitanni noota Qullaawu Maxaafi xawisanno. Isinni Qullaawu Maxaafi borreessaanchi Luqaasi, hatte yannara Beeteleemete qooxeessira ‘allaalaasine hashsha saada agadhitanni galtannota’ xawisino. (Luqaasi 2:8-12) Hakkawaro allaalaasine saadansa hashsha agadhitanni galtannota wodanchi. Tini allaalaasine qorru  uwannohuranna xeenu batiˈranno aganira yaano Sadaasaho gobba gala dandiitanno? Didandiitanno. Konni daafira Yesuusi ilami yannara noo ikkito, isi Sadaasu aganira ilaminokkita leellishshanno. *

Maganu Qaali Yesuusi reyino yanna xawise kulanno; ikkollana isi ilamino yanna afa dandiineemmo gede kaaˈlannonkere shiimarella kulanno. Tini qolte Nugusu Salamooni yiino yaatto qaangeemmo gede assitannonke. Isi togo yiino: “Dancha shittonni suˈmu rooreho; qoleno ilamate barrinni reyote barri rooreho.” (Mekibibi 7:1) Konni daafira, Qullaawu Maxaafi Yesuusi soqqanshorenna reyosire lowore kule, ilamino barrire kayinni shiimare calla kulasi xaggeeffantannita diˈˈikkitino.