TSY rehafe ty Baiboly tie ombia ty niterahagne i Jesosy. Faie misy anto’e maregne ty agnate’e ao hirehafagne fa tsy Desambera ty volagne niterahagne aze.

Eretsereto tie nanao akore ty andro ta Betilehema agne tamy ty date niterahagne i Jesosy. Nanintsigne naho nagnoragne ty andro naho fa amy ty volagne jiosy atao tihoe Kisileva (Novambera/Desambera). Tagnila’eo avao ka ty volagne Tebeta (Desambera/Zavié). O volagne iohoe ty fara’e nanintsigne tamo o taogne iohoe, sady nisy lanezy ty ambohitsey. Handineke ty raha rehafe ty Baiboly miomba izay tikagne.

Mirehake ty Ezera mpanoratse Baiboly fa nalaza ho nanintsigne naho nagnoragne ty volagne Kisileva. Nitantara reke fa ‘nititike ty nara iaby ze ndaty nivory ta Jerosalema ao fa niavy bey i oragney tamy ty faha-29 ty volagne fahasive [Kisileva].’ Nirehake ty ndaty tamy izay tie: ‘Tsy mahatoboke an-taney  zahay fa avy i oragney.’ (Ezra 10:9, 13; Jeremia 36:22) Tsy ilatsagne naho tsy nijanogne an-teteke agne halegne ty mpiarake agnondry miharo ty agnondri’e tamo o faritse iohoe naho fa volagne Desambera!

Mirehake ty Baiboly fa niarake ty agnondri’e an-teteke agne ty mpiarake agnondry tamy ty halegne niterahagne i Jesosy. Nirehake ka ty Lioka mpanoratse Baiboly fa nitoboke an-tetekey iareo tamo o halegne iohoe, “niarak’agnondry” marine i Betilehema. (Lioka 2:8-12) Tsy tihoe nirererere an-teteke agne avao iareo fa nitoboke agne reketse ty agnondri’e tamo o halegne iohoe. Hanao izay amy ty volagne Desambera vao iareo, ie amy izao manintsigne naho magnoragne ty a Betilehema agne amo o volagne iohoe? Tsy hanao izay iareo. Tsy volagne Desambera ty niterahagne i Jesosy naho dinehegne ty raha niseho tamy ty volagne niterahagne aze. *

Rehafe ty Baiboly mazava tie ombia ty nimateza i Jesosy. Fa ty date niterahagne aze ro tsy rehafe ty Baiboly loatse. Maniahy antikagne ty reha i Solomona Mpanjaka toy zay. Hoe reke: “Ndraleo laza soa ta tie menake magnitse, sady ndraleo ty andro imatezagne ta tie andro iterahagne.” (Mpitoriteny 7:1) Tsy mahalatsa naho magnazava miomba ty fanompoa i Jesosy naho ty nahafate aze ty Baiboly fa tsy nirehake fire miomba ty andro niterahagne aze.