E SE taku mai i te Tusi Tapu a te aso ne fanau ei a Iesu. Kae e tuku mai i ei a pogai ‵lei ke fakaiku aka ne tatou me ne seki fanau mai a ia i a Tesema.

Mafaufau ki te tau-o-aso i te taimi tenā o te tausaga i Peteleema, ko te koga telā ne fanau mai i ei a Iesu. A te masina faka-Iutaia ko Kisilevu (Novema io me ko Tesema) se masina ‵moko kae ‵tō foki i ei a vaiua. A te masina mai tua ifo i ei ko Tepete (Tesema io me ko Ianuali). Ko te ‵toe taimi ‵moko eiloa i te tausaga, kae ne ‵to mai ei te kiona i koga ma‵luga i nisi taimi. Ke onoono aka tatou me ne a muna i te Tusi Tapu e uiga ki te tau-o-aso i kogā fenua konā.

E fakaasi mai ne te tino tusitala o te Tusi Tapu ko Esela me i a Kisilevu se masina ‵moko kae ‵tō vaiua. Mai tua o te takumaiga ne ia e uiga ki se vaitino telā ne maopoopo atu i Ielusalema “i te po luasefulu o te iva o masina [o Kisilevu],” ne fakaasi mai ne Esela me “ko oko eiloa i te lasi o te vaiua e ‵tō i te taimi tenā, tela la, a tino ko pole‵pole fua ona ko te masei o te aso.” Ne fai atu foki eiloa a tino kolā ne maopoopo atu i ei e uiga ki te tau-o-aso i te taimi tenā o te tausaga, penei: “Ka ko te vaiua ko oko eiloa i te ‵tō  malosi. E se mafai ne matou o ‵tu penei i te matāfale.” (Esela 10:9, 13; Ielemia 36:22) E se tioa eiloa o se ‵nofo atu i tua i po a tausi mamoe mo olotou mamoe i te masina o Tesema!

Kae e fakaasi mai i te Tusi Tapu me ne ‵nofo atu a tausi mamoe mo olotou mamoe i tua i te po ne fanau mai ei a Iesu. A te ‵tonuga loa, e fakaasi mai ne te tino tusitala o te Tusi Tapu ko Luka me i “tausi mamoe ne ‵nofo i te kogā vao tenā i te po, e tausi olotou mamoe” i se koga pili ki Peteleema. (Luka 2:8-12) Onoono aka la me ne ‵nofo atu a tausi mamoe i te kogā vao kae e se fai mai i ei me ne sa‵sale atu fua latou i tua i te ao. Ne ‵nofo atu mo olotou mamoe i tua i te po. E mata, e fetaui ‵lei te fakamatalaga tenā e uiga ki te ‵nofo atu i tua mo te ‵tau ‵moko kae ‵tō vaiua i Peteleema i te masina o Tesema? Ikai, e se fetaui. Tela la, a mea kolā ne ‵tupu i te taimi ne fanau mai ei a Iesu e fakaasi mai i ei me ne seki fanau a ia i te masina o Tesema. *

E fakaasi faka‵lei mai eiloa ne te Muna a te Atua a te taimi ne mate ei a Iesu, kae e se uke a fakamatalaga e uiga ki te taimi tonu telā ne fanau mai ei a ia. E fakamasaua mai i ei a pati a te Tupu ko Solomona, penei: “A te takuleia o te tino e sili atu te ‵lei i lō te sausau manogi kae ‵togi ‵mafa; a te aso e mate ei koe e ‵lei atu i te aso ne fanau mai ei koe.” (Failauga 7:1) Tela la, e se se mea fakapoi me e taku mai i te Tusi Tapu a te fia o fakamatalaga likiliki e uiga ki te galuega a Iesu mo tena mate kae e se uke a fakamatalaga e uiga ki te taimi ne fanau mai ei a ia.