EMBIMBILIYA ka li tu sapuila eteke Yesu a citiwa. Pole, li tu sapuila esunga lioku limbuka okuti Yesu ka citiwile vosãi ya Cembanima.

Tu kũlĩhĩsi ndomo otembo ya siata oku kala ko Beteleme kuna Yesu a citiwila kosãi ya Cembanima. Osãi va Yudea va tukowaile hati, Kisileu (okuti oloneke via pita pokati ka Kuvala la Cembanima) ya kala osãi yimue yombambi kuenda ombela yi loka calua. Osãi ya Tevete oyo ya enda oku kuamamo (okuti oloneke via pita pokati ka Cembanima la Susu). Osãi eyi kofeka yaco ku talala calua okuti olonjanja vimue kolomunda ku tunda ombundu. Tu konomuisi eci Embimbiliya li tu sapuila catiamẽla kekalo liofeka yaco.

Usonehi Wembimbiliya Esera wa lekisa okuti osãi ya Kisileu, ya kala osãi yimue okuti kofeka yaco ku talala kuenda ombela yi loka calua. Poku tukula owiñi wongolokelele ko Yerusalãi ‘keteke liakũi avali kosãi yecea [Kisileu],” Esera wa lombolola  okuti omanu “va kala . . . loku lulumila ombela yalua ya kala loku loka.” Catiamẽla kotembo ndomo ya siata oku kala vosãi eyi kofeka yaco, owiñi wa liongoluile wa popele hati: “Cilo ondombo, ka tu tẽla oku kala posamua.” (Esera 10:9, 13; Yeremiya 36:22) Eli olio esunga lieci angombo kofeka yaco va enda loku yikila olomeme viavo kovoteke osi kosãi ya Cembanima.

Pole, Embimbiliya li tu sapuila okuti angombo va kala voluayela oku lava olomeme viavo vuteke Yesu a citiwa. Usonehi Wembimbiliya Luka o tu sapuila okuti kotembo yaco, ovangombo “va lala lala vusenge oku lava olomeme viavo kuteke” ocipepi lo Beteleme. (Luka 2:8-12) Angombo va lala lala vusenge. Ka va endailemo ño oku ka lisa ovinyama viavo lutanya. Ovo va lala lala lovinyama viavo vusenge. Nda ca kaile kosãi ya Cembanima okuti ku talala kuenda ombela yi loka calua angombo nda va kala hẽ lovinyama viavo voluayela? Ocili okuti nda ka va kaile. Cosi eci ci lekisa okuti Yesu ka citiwile kosãi ya Cembanima. a

Embimbiliya li tu sapuila otembo Yesu a fa. Pole ka li tu sapuila eteke a citiwa. Eci ci tu ivaluisa olondaka via Soma Salomone wa popele hati: “Onduko yiwa ya velapo, onguendu ya tĩla yi sule; eteke liokufa lia velapo, eteke lioku citiwa li sule.” (Ukundi 7:1) Eli olio esunga lieci Embimbiliya li tu sapuilila ovina vialua viatiamẽla kupange Yesu a linga toke koku fa kuaye. Pole ka li tu sapuila calua catiamẽla koku citiwa kuaye.