TE TAHI ’U FAKAMAHINO
Ne’e Tupu Koa Ia Sesu ’i Tesepeli?
’E MOLE fakahā mai ’i te Tohi-Tapu pe ko ’anafea ’aē ne’e tupu ai ia Sesu. Kae ’e tou mahino ’aki te Tohi-Tapu, ko Sesu ne’e mole tupu ’i te māhina ’o Tesepeli.
Tou talanoa mu’a ki te agaaga ’o te temi ’i Petelehemi, te kolo ’aē ne’e tupu ai Sesu. ’I te kaletalio Sutea, ko te māhina ko Kislev (Novepeli mo Tesepeli) ne’e ko te māhina momoko pea mo ’ua. Ko te māhina ’aē ne’e hoa mai kiai ko Tébeth (Tesepeli mo Sānualio), ne’e momoko kovi, pea ne’e nive ’i te ’u mo’uga. Tou vaka’i age mu’a pe’e koteā ’aē ’e ’ui ’i te Tohi-Tapu ’o ’uhiga mo te agaaga ’o te temi ’i te potu fenua ’aia.
’E ’ui e te tagata faitohi ’o te Tohi-Tapu ko Esitalasi, ne’e momoko pea mo ’ua te māhina ko Kislev. ’I tana ’osi talanoa ’o ’uhiga mo te haha’i tokolahi ’aē ne’e fakatahi ’i Selusalemi “ ’i te hiva māhina [Kislev], ’i te ’uafulu ’aho ’o te māhina,” ’e ’ui e Esitalasi ko te haha’i ne’e nātou “mōkosisia…’uhi ko te ’u ’ua lalahi ’aia.” ’O ’uhiga mo te agaaga ’o te temi ’i te māhina ’aia, ko te haha’i ’aē ne’e fakatahitahi ne’e nātou ’ui: “Ko te māhina ’ua ’aenī, ’e mole feala ke tou nonofo ’i tu’a.” (Esitalasi 10:9, 13; Selemia 36:22) ’E mahino ia, ’i Tesepeli, ko te kau tauhi ōvi pea mo tanatou ’u faga manu ’o te ’u potu fenua ’aia ne’e mole kei nātou nonofo ’i tu’a ’i te pō’uli!
’I te pō ’aē ne’e tupu ai Sesu, ko te kau tauhi ōvi pea mo tanatou ’u faga manu ne’e nātou nonofo ’i te ’u gāue’aga
Kae ’e ’ui ’i te Tohi-Tapu, ’i te pō ’aē ne’e tupu ai Sesu, ko te kau tauhi ōvi mo tanatou ’u faga ōvi ne’e nātou nonofo ’i tu’a. Pea ’e ’ui e te tagata faitohi ’o te Tohi-Tapu ko Luka, ’i te temi ’aia ’o ōvi atu ki Petelehemi, ko te kau tauhi ōvi ne’e nātou “nonofo ’i tu’a ’o nātou le’ole’o tanatou ’u faga ōvi ’i te pō’uli.” (Luka 2:8-12, MN) ’E koutou tokaga’i ’e nonofo ’o mā’u’uli mo’oni ia te kau tauhi ōvi ’i te ’u gāue’aga, ’e mole fe’olo’aki pe nātou ’i tu’a lolotoga te ’aho. Pea tahi ’aē, ko ’anatou faga ōvi ’e nonofo ’i tu’a lolotoga te pō’uli. Ko te fakamatala ’aia ’o tanatou nonofo ’i tu’a, ’e ’alutahi koa mo te ’u agaaga ’o te temi momoko pea mo ’ua ’o Petelehemi ’i Tesepeli? Kailoa. Koia, ’e ’asi mai ’i te ’u me’a ’aē ne’e hoko ’i te temi ’aē ne’e tupu ai Sesu, ’e mole feala ke ’ui ne’e tupu ’i Tesepeli.*
’E fakahā lelei mai ’i te Folafola ’a te ’Atua te temi ’aē ne’e mate ai Sesu, kae ’e mole lahi te ’u fakamatala ’o ’uhiga mo te temi ’aē ne’e tupu ai. Koia ’e tou manatu’i ai te ’u palalau ’aē ne’e fai e te Hau ko Salomone: “’E ma’uhiga age he higoa ’i he lolo magoni, pea ’e lelei age te ’aho ’o te mate ’i te ’aho ’aē ne’e kita tupu ai.” (Tagata Tānaki 7:1) Koia ’aē ’e mahino ai kiā tatou pe ko’e ’e lahi te ’u fakamatala ’i te Tohi-Tapu ’o ’uhiga mo te minisitelio pea mo te mate ’a Sesu, kae mole lahi tana ’u fakamatala ’o ’uhiga mo te temi ’aē ne’e tupu ai.
* Kapau ’e koutou fia ma’u he tahi ’u fakamahino, koutou vaka’i ’i te pasina 161 ki te 165 ’o te tohi Comment raisonner à partir des Écritures, ’aē ne’e tā e te kau Fakamo’oni ’a Sehova.