ბიბლია კონკრეტულო მუთუნს ვეჩიებ იესოშ დაბადებაშ თარიღიშ გურშენ. მარა ღორონთიშ სიტყვაშე არგამათ იძირე, ნამდა იესო დეკემბერიშ თუთას ვა დაბადებე.

მორთ ქიგებგათ, მუნერ ამინდეფ რდუ ბეთლემს წანაშ თი დროს, მუჟამს იესოქ დებადუ. ქისლევს (თუთაშ სახელ ებრაულ კალენდარს, ნამუთ ოსადაგ ნოემბერ-დეკემბერს) გლახა ამინდეფ რდუ — ჩხურ დო ჭვემა. ქისლევიშ უკულ დოდირთუდ ტებეთიშ თუთა (დეკემბერ-იანარი). წანაშ თე დროს არძაშ უმოს დაბალ ტემპერატურა რდუ; გვალას მინშა თუნდ. ქობძირათ, მუს მირაგადნა ბიბლია თექიან კლიმატიშ გურშენ.

ბიბლიაშ ართ-ართ მაჭარალ ეზრა იჩიებ, ნამდა ქისლევიშ თუთას ჩხურ დო ჭვემეფ რდუ. ეზრა ჭარუნს, ნამდა „მაჩხორა თუთას [ქისლევს], თუთაშ მაეჩა დღას“ ხალხიქ იერუსალიმს დიშაყარ. უკულ იჩიებ, ნამდა ხალხი „კანკალანდუ . . . გიმანტირეთ ჭვენდუნ თიშენ“ დო იჩიებდეს: „ჭვემა დღალეფ რე დო გალე ვემწირინე“  (ეზრა 10:9, 13; იერემია 36:22). მუ რაგად ოკო, თექიან ჭყიშეფ დეკემბერს სერით ვართ მუნეფ ელადირთუდეს გალე დო ვართ მუნეფიშ შხურეფს ელეტენდეს.

ბიბლიაშე თის ხოლო ბგებულენთ, ნამდა იესოქ დებადუნ თიმ სერს, ჭყიშეფ მუნეფიშ შხურეფწკუმა ართო გალე რდეს. ბიბლიაშ მაჭარალ ლუკა პირდაპირ იჩიებ, ნამდა ბეთლემწკუმა ხოლოს „ჭყიშეფ მინდორო რდეს დო სერით მუნეფიშ შხურეფს თხილანდეს“ (ლუკა 2:8—12). ყუჯ ქათხი, ნამდა ჭყიშეფ ხვალე დღაშით ვარინ, სერით ხოლო გალე ელარდეს დო თხილანდეს მუნეფიშ შხურეფს. თაქ ნარაგადა ქაძირანსო თი ფაქტის, ნამდა ბეთლემს დეკემბერიშ თუთას, გლახა ამინდეფი, ჩხურ დო ჭვემა რდუნ თის? მუშო ოკო რაგად, ვარ. თავრეშე იძირე, ნამდა იესო დეკემბერს ვა დაბადებე. *

ღორონთიშ სიტყვა ზუსტას მირაგადნა, მუჟამს ღურ იესოქ, მარა თიშ დაბადებაშ დროშენ ბრელ მუთუნს ვეჩიებ. თენა გუმოშინანა მეფე სოლომონიშ სიტყვეფს: „ჯგირ სახელ უჯგუ ჯგირ ზეთის დო ღურაშ დღა — დაბადებაშ დღას“ (ეკლესიასტე 7:1). ათეშგურშენ, ბიბლიას კილ-კილშა რე ეჭარილ იესოშ მსახურებას დო ღურას ოხუნფერ მოვლენეფი, მარა გვალო ჭიჭე ინფორმაცია რე მოჩამილ თიშ დაბადებაშ გურშენ.