AN Biblia bakong an ginikanan kan popular na mga kapiestahan na relihioso asin sekular na sineselebrar sa dakol na parte kan kinaban ngonyan. Kun siring, ano an ginikanan kan siring na mga selebrasyon? Kun puede kamong magsiyasat sa sarong libreriya, madidiskobre nindo na interesanteng maaraman kun ano an sinasabi kan mga  reperensia manongod sa mga kapiestahan na popular sa lugar na ineerokan nindo. Estudyare an nagkapirang halimbawa.

Pasko nin Pagkabuhay. “Daing ipinaparisang pagselebrar kan kapiestahan nin Pasko nin Pagkabuhay sa Bagong Tipan,” an sabi kan The Encyclopædia Britannica. Paano nagpoon an Pasko nin Pagkabuhay? Iyan naggikan sa paganong pagsamba. Minsan ngani an kapiestahan na ini hinihingako na paggirumdom sa pagkabuhay liwat ni Jesus, an mga kostumbre na konektado sa Pasko nin Pagkabuhay bakong sa Kristiano. Halimbawa, may labot sa popular na “kuneho sa Pasko nin Pagkabuhay,” an The Catholic Encyclopedia nagsasabi: “An kuneho sarong paganong simbolo asin kaidto pa emblema na nin pagigin mainaki.”

Mga Selebrasyon sa Bagong Taon. An petsa asin mga kostumbre na konektado sa mga selebrasyon sa Bagong Taon nagkakalaenlaen sa kada nasyon. Mapadapit sa ginikanan kan selebrasyon na ini, an The World Book Encyclopedia nagsasabi: “Inestablisar kan Romanong namamahala na si Julio Cesar an Enero 1 bilang an Aldaw kan Bagong Taon kaidtong 46 B.C. Idinusay kan mga Romano an aldaw na ini ki Janus, an dios nin mga tata, pinto, asin kapinonan. An bulan na Enero (sa Ingles, January) kinua sa ngaran ni Janus, na may duwang lalauogon​—an saro nakaheling sa enotan asin an sa ibong nakaheling sa likod.” Kaya an mga selebrasyon sa Bagong Taon nakabase sa paganong mga tradisyon.

Pangangalag. An The Encyclopedia Americana nagsasabi: “An mga aspekto kan mga kostumbre na konektado sa Pangangalag masususog sa sarong seremonyang Druida [suanoy na mga saserdoteng Celtico] kan mga panahon bago kan mga Kristiano. An mga Celta may mga kapiestahan para sa duwang pangenot na dios​—sarong dios na saldang asin sarong dios kan mga gadan . . . , na an kapiestahan ginigibo kun Nobyembre 1, an kapinonan kan Celticong Bagong Taon. An kapiestahan kan mga gadan luway-luway na isinaro sa Kristianong ritual.”

Iba Pang mga Kapiestahan. Dai puedeng tokaron an gabos na selebrasyon na ginigibo sa bilog na kinaban. Minsan siring, an mga kapiestahan na nagpapamuraway sa mga tawo o mga organisasyon nin tawo dai maaako ni Jehova. (Jeremias 17:5-7; Gibo 10:25, 26) Girumdomon man na an ginikanan kan relihiosong mga selebrasyon nagdedeterminar kun baga iyan nakakapaogma sa Dios o dai. (Isaias 52:11; Kapahayagan 18:4) An mga prinsipyo sa Biblia na nasambitan sa Kapitulo 16 kan librong ini makakatabang sa saindo na madeterminaran kun ano an pagmansay nin Dios sa pakikikabtang sa sekular na mga kapiestahan.