E LEVU na olodei vakalotu kei na olodei tale eso sa soqovi tu nikua e vuravura era sega ni yavutaki ena iVolatabu. Era vu ga mai vei? Ke rawa mo lai vakekeli ena valenivola, o na raica na ka era kaya eso na ivola me baleta na olodei era sa takalevu tu ena nomu itikotiko. Dikeva mada eso na kena ivakaraitaki.

Easter. E kaya na Encyclopædia Britannica: “E sega sara ni tukuni vakalailai ena Veiyalayalati Vou na soqovi ni Easter.” Ia e tekivu ga mai vei na soqovi ni Easter kei na veika tale eso e dau salavata mai? E vu mai na lotu butobuto. Era nanuma e levu ni olodei qo e vakananumi kina na tucake tale i Jisu, ia na veika e vakayacori ena Easter e sega sara ga ni vu mai na lotu vaKarisito. Kena ivakaraitaki, e kaya na Catholic Encyclopedia: “E levu sara na ivalavala ni lotu butobuto, me vaka na soqovi ni vulaitubutubu, e sa lai taurivaki ena Easter. Na yaloka e ivakatakarakara ni itekitekivu ni bula ena vulaitubutubu.”

Vakatawase. E duidui na tikinisiga, kei na ivakarau ni kena dau soqovi na vakatawase ena dui vanua. Ia e kaya na World Book Encyclopedia me baleta na itekitekivu ni kena soqovi na vakatawase: “A lesia na iliuliu kei Roma, o Julius Caesar na Janueri 1 me itekitekivu ni siga ni yabaki vou ena 46 G.V. Era mani vakatabuya na siga ya na kai Roma vei Janus, na kalou ni matamata, katuba, kei na itekitekivu. E vakatokayacataki na vula o Janueri vei Janus, e tukuni ni rua na matana—dua e qara i liu, dua e qara i muri.” O koya gona, na marautaki ni vakatawase e vu mai na lotu butobuto.

Valentine’s Day. E kaya na World Book Encyclopedia: “Na siga donuya na Valentine’s Day e dau siga ni kana magiti me vakananumi kina na nodrau vakamatei e rua na lotu vaKarisito e yacadrau o Valentine. Ia na veika e vakayacori ena siga ya . . . e vakabauti ni vu mai na dua na solevu vakaRoma e vakatokai na Lupercalia, e dau vakayacori e veiyabaki ena ika15 ni siga ni vula o Feperueri. Na solevu qo e dau vakananumi kina o Juno, na nodra kalou na yalewa ni Roma, e kalou tale ga ni vakawati, vaka kina o Pan, na kalou ni veika era tu wavoliti keda.”

So Tale na Olodei. E sega ni rawa ni tukuni kece na veiolodei e dau solevutaki ena veiyasa i vuravura. Ia e cata o Jiova na olodei e vakacerecerei kina na tamata se isoqosoqo vakatamata. (Jeremaia 17:5-7; Cakacaka 10:25, 26) Kua tale ga ni guilecava ni vanua era yavutaki mai kina na veiolodei vakalotu ena vakatau tale ga kina na nona vakadonuya na olodei ya o Jiova se sega. (Aisea 52:11; Vakatakila 18:4) Na yavu vakaivolatabu e tiko ena Wase 16 ni ivola qo ena vakarawarawataka na noda kila se raica vakacava o Jiova na veiolodei e sega ni dua na kena isema kei na ka vakalotu.