NNOJOTSÜ suluʼujeejatüin tü Wiwüliakat tü miʼiraa saainjakat tü iküleesia nnojotkat shiimain otta tü naainjakat na wayuukana maaʼulu. ¿Jalejeekuwat shia? Püchajaale suluʼu waneeirua karaloukta, puusüteerü anain tü aküjünakat süchiki tia miʼiraakat. Wekirajaa sünain süpüshi tia.

Semanasanta. Mayaapejeʼe saainjünüin tia süpüla sotuin saaʼin wayuu ouktüin otta süsoʼiraain naaʼin Jesuu, wainma tü  kasa mojusü aainjünakat sünain maʼaka süwaraijinnüin ayaakuaa. Saashin tü karalouktakat Las Grandes Religiones Ilustradas, nüpülapünaa Kürisüto, «wainma tü kasa naainjakat [na chejeʼewaliikana Babilonia] süpüla naʼwaajüin tü ayaakuaakalüirua  [...]. Anasü maʼin süsheʼin natuma, süüliijana, sajapüna, süsüttiijase otta kapülajanasü shia süpüla süwaraijinnüin».

Süntia Juya Jeketü. Sainküin tü mmakat naatawaisü tü miʼiraa aainjünakat süntia tü Juya Jeketkat. Müsü sukuwaʼipa sümaiwa saashin tü karalouktakat The World Book Encyclopedia: «Soʼu tü juyakat 46 nüpülapünaa Kürisüto, chi aluwataakai Roma Julio César nüneeküin 1 eneeroʼu süpüla saainjünüin miʼiraa süntia tü Juya Jeketkat. Na chajanakana Roma naneeküin tia kaʼikat nüpüla Jano, chi maleiwayaashi sünainpünaakai suʼttia tü kasakalüirua. Sünülia tü kashikat eneeroʼu [süka latín, Januarius] sünainjeejatü nünülia Jano, piamasü nuʼupünaa: wanee nüpüleeruajee otta wanee nüchiiruajee». Makalaka tü miʼiraa aainjünakat süntia tü Juya Jeketkat namaʼanajeejatü na manoujainsaliikana.

Miʼiraa aainjünaka 31 oʼutuupüroʼu (Halloween). Saashin tü karalouktakat The Encyclopedia Americana «naainjapuʼuin shia na kanüliakana druidas [sacerdote celta] süpülapünaa nakalia na nikirajüinkana Jesuu. Na celtakana aainjapuʼushii miʼiraa namüin piamashii namaleiwase: chi Kaʼi maleiwayaakai otta namaleiwase na ouktüshiikana  [...]. Aainjünapuʼusü miʼiraa nümüin namaleiwase na ouktüshiikana 1 nowienpüroʼu, suʼttia tü Juya Jeketkat namüin na celtakana. Tia naainjain shia mapa na wayuu anoujakana».

Waneeirua miʼiraa. Nnojotsü süpüla süküjünüin achiki suluʼu tü karalouktakat süpüshuaʼa tü miʼiraa aainjünakat sainküin mma. Nnojotsü nücheküin Jeʼwaa tü miʼiraa aainjünakat süpüla yaletüin wanee wayuu otta wanee kasa (Jeremías 17:5-7; Aluwataaushikana 10:25, 26). Süpüla piyaawatüin tü miʼiraa anakat nümüin Jeʼwaa pütüjaainjatü aaʼu jamakuwaʼipalüin shia (2 Corinto 6:17, 18; Alateetkat Mapeena 18:4). Sutuma tü pütchi suluʼukat ekirajaaya 16 pütüjaajeerü aaʼu jamüin nümüin Maleiwa sünainpünaale pia tü miʼiraa naainjakat na manoujainsaliikana.