XILLA n leɛyudat, ama cuddent ɣer ddin ama ur cuddent ara, ţɛeggiden-​tent ass-​a deg waṭas n imeḍqan di ddunit. Lameɛna, ur d-​kkint ara seg Wedlis Iqedsen. Ansi i d-​usant ihi? Ma teţţunefk-​ak tegniţ aţ-​ţkecmeḍ ɣer yiwet n temkarḍit (tazeqqa ideg i ssexzanen tiktabin), aţ-​ţafeḍ d acu i d-​qqaren yedlisen yesɛan azal ɣef leɛyudat yeţwassnen di lǧiha anda i tzedɣeḍ. A d-​nẓer kra n lemtul.

 Tafaska. Amawal yeţţusemman The Encyclopædia Britannica yenna-​d: “Ur neţţaf ara yakk aɛegged n Tfaska [...] di Lɛahd Ajdid.” Ansi i d-​tekka lɛid-​agi n Tfaska? Tekka-​d si ddyanat ideg i ţɛebbiden iṛebbiten. Tafaska iɣef i d-​nheddeṛ dagi ţ-​ţin i ţɛeggiden kra n medden bac a d-​smektin ḥeggu n Ɛisa si lmut; lameɛna leɛwayed icudden ɣur-​es ur d-​kkint ara si ddin amasiḥi. Di lemtel, amawal umi qqaren The Catholic Encyclopedia yenna-​d ɣef wayen yeɛnan “awtul n Tfaska”, i geţwassnen mliḥ: “Awtul [yesɛa lqima] ɣer ddyanat ideg i ţţeɛbaden iṛebbiten, yerna si zik iţmettil-​ed tarrawt [afukti].”

Aseggas Ajdid. Ass ideg i ţɛeggiden Aseggas Ajdid akk-​d leɛwayed icudden ɣur-​es mxallafen si tmurt ɣer tayeḍ. Atan d acu i d-​issefhem yiwen umawal (The World Book Encyclopedia) ɣef laṣel n lɛid-​agi: “Deg useggas 46 uqbel Ɛisa, lḥakem aṛumani Yulyus Qayṣer yeqsed ad yerr ass amezwaru n waggur n yennayer d Ass Amezwaru n Useggas. Iṛumaniyen ţbuddun ass [amezwaru n yennayer] i Yanus, aṛebbit n tewwura d wayen akk i gbeddun. Yennayer yewwi-​d isem-​is si Yanus; aṛebbit-​agi yesɛa sin wudmawen: yiwen yezzi ɣer zdat wayeḍ ɣer deffir.” Ihi, lɛaddat i gcudden ɣer Useggas Ajdid kkant-​ed si ddyanat ideg i ţɛebbiden iṛebbiten.

Haluwin. Yura deg wedlis yeţţusemman The Encyclopedia Americana: “Kra si leɛwayed n Haluwin zemrent ad ilint cuddent ɣer yiwet n tmeɣra [i llan xeddmen-​ţ lmuqeddmin n Isaltiyen] uqbel zzman n Lmasiḥ. Isaltiyen xeddmen tameɣra ɣef ddemma n sin iṛebbiten imeqranen: aṛebbit iṭij akk-​d uṛebbit n lmeggtin [...]. Xeddmen tameɣra-​ya ass amezwaru si wambeṛ, i gellan d ass amezwaru n useggas ajdid n Isaltiyen. Lɛid n wid yemmuten tekcem-​ed cwiṭ cwiṭ ɣer leɛwayed n ddin amasiḥi.”

Leɛyudat nniḍen. Ur nezmir ara a d-​nehdeṛ ɣef leɛyudat meṛṛa yellan di ddunit. Acu kan, tid yeţţaken ccan i lɛibad, neɣ i tuddsiwin n lɛibad, ur ɛǧibent ara i Yahwa. (Irmiya 17:5-7; Lecɣal 10:25, 26) Ur teţţu ara daɣen belli lɛid icudden ɣer ddin tezmer a s-​teɛǧeb i Ṛebbi, neɣ ur s-​teţţeɛǧab ara, ɛlaḥsab n laṣel-​is. (Icɛaya 52:11; Aweḥḥi 18:4) Imenzayen n Wedlis Iqedsen, yellan deg yixef wis 16, a k-ɛiwnen daɣen aţ-​ţfehmeḍ amek i geţwali Ṛebbi acarek di leɛyudat n ddunit.