BIBLIA amo kiijtoua ma tiiljuichiuakaj kej kampa ueli kichiuaj. Uan, ¿kenke pejkej iljuichiuaj? Tlaj tias kampa onka miak amochtli uan tijpouas, tijmatis kenke pejkej iljuichiuaj. Ma tikitakaj se keski.

Semana Santa. Maske ika ni iljuitl kiijtouaj kiilnamikij kema mijki uan moyolkuik Jesús, kichiuaj kej katli kinueyichiuayayaj sekinok teotsitsij, pampa kitlayaualoltiaj se tlaixkopinkayotl.  Nopa amochtli Las Grandes Religiones Ilustradas kiijtoua kema ayamo ualajtoya Cristo, babiloniaeuanij “kinueyichiuayayaj tlaixkopinkayomej ika miak tlamantli [...]. Kinyoyontiyayaj ika kuajkuali yoyomitl, kintlaliliyayaj kostli, brazaletes uan anillos; nojkia kinchiuiliyayaj uejueyi kali kampa kintlaliyayaj uan kintlayaualoltiyayaj”.

Yankuik Xiuitl. Ipan Yankuik Xiuitl amo nochi sanse iljuichiuaj. Ipan amochtli The World Book Encyclopedia kiijtoua kenijkatsa pejki: “Ipan xiuitl 46 kema ayamo ualajtoya Cristo, Julio César katli tlanauatiyaya Roma, kiijtok ipan mestli enero 1 peuaskia nopa Yankuik Xiuitl. Ipan ni tonali romaeuanij kiijtojkej kiueyichiuaskiaj ininteotsij Jano, tlen tlamokuitlauia ipan ininkalte uan kampa peua nochi. Nopa mestli enero [ika latín, Januarius] kitokaxtijkej kej ininteotsij Jano, tlen kipixtoya ome iixayak: se tlachiayaya ika tlaixpa uan se ika iika”. Uajka, nopa Yankuik Xiuitl pejkej kichiuaj katli kinueyichiuayayaj sekinok teotsitsij.

Kema kiniljuichiuiliaj mijkatsitsij (Xantolo). Ipan amochtli The Encyclopædia Britannica kiijtoua: “Nopa tonali kema kinilnamikij mijkatsitsij [...] kitlapejpenijkej ipan Iglesia Católica Romana. [...] Katli kinueyichiuayayaj sekinok teotsitsij, uejkajkia pejkej kineltokaj se keski tlamantli tlen nopa tonali kema kinilnamikij mijkatsitsij. Yeka ipan miak altepemej, católicos kineltokaj mijkatsitsij sampa ualauij ininchajchaj kampa itstoyaj uan kikuaj tlen maseualmej kitlaliaj ipan tlaixpamitl”.

Sekinok iljuitl. Ipan Tlaltipaktli mochiua miak iljuitl, yeka amo uelis tikitasej kenijkatsa pejkej kichiuaj sejse iljuitl. Jehová amo kineki ma titeueyichiuakaj ika se iljuitl (Jeremías 17:5-7; Hechos 10:25, 26). Tlaj tikitas ajkia pejkej kichiuaj sejse iljuitl, tijmatis tlaj toTeotsij kipaktia o amo (Isaías 52:11; Apocalipsis [Revelación] 18:4). Tlen moixtonki ipan tlamachtili 16 mitspaleuis tijmatis kenijkatsa kiita toTeotsij sekinok iljuitl tlen kichiuaj ipan escuelas uan ipan altepemej.