Tukaakurize Ebiro Bikuru?

BAIBULI ti burugo bw’ebiro bikuru by’ediini hamwe n’ebindi biro bikuru ebirikukuzibwa omu myanya mingi omu nsi omu bunaku obu. Mbwenu shi obwo, okukuza ebiro bikuru kukakomooka nkahi? Ku oraabe noobaasa kutunga ebitabo kuruga omu ibiikiro ryabyo, bishome haza nikiija kukushemeza okureeba eki birikugamba aha biro bikuru ebirikukuzibwa omu kicweka ki orikutuuramu. Teekateeka aha by’okureeberaho ebimwe.

 Paasika. “Omu Ndagaano Ensya, tiharimu aharikworeka ngu hakaba habaho okukuza Paasika,” kityo nikwo ekitabo ekirikwetwa The Encyclopædia Britannica kirikugira. Kandi shi Paasika ekatandika eta? Nekomooka omu kuramya kw’ekikaafiire. N’obu kiraabe nikigambwa ngu ekiro eki nikikuzibwa okwijuka okuzooka kwa Yesu, emigyenzo erikukorwa omu bwire bwa Paasika ti y’Ekikristaayo. Nk’eky’okureeberaho, ebirikukwata ahari Paasika ei barikuheeraho obume nk’ebiconco Easter bunny, ekitabo ekirikwetwa The Catholic Encyclopedia nikigira kiti: “Akame n’akamanyiso k’abakaafiire kandi katuura kari akamanyiso akarikumanyisa orweezo.”

Okukuza Kibanza ky’Omwaka. Ekiro hamwe n’emigyenzo erikukorwa okukuza Kibanza ky’Omwaka omu mahanga maingi tibirikushushana. Ebirikukwata aha bukomooko bw’emikoro egi, ekitabo ekirikwetwa The World Book Encyclopedia nikigira kiti: “Julius Ceaser Omutegyeki w’Abarooma akatandika kukuza 1 okw’Okubanza nk’Ekiro ky’Okubanza omu mwaka omu gwa 46 B.C. Abarooma bakahayo ekiro eki ahari Janus ruhanga w’amarembo, enyigi hamwe n’entandikiro. Okwezi kw’Okubanza omu mwaka (January) kuketerererwa eiziina rya Janus, owaabaire aine aha maisho habiri—ahamwe harikureeba enyima n’ahandi harikureeba omu maisho.” N’ahabw’ekyo, okukuza Ekibanza ky’Omwaka nikukomooka omu migyenzo y’ekikaafiire.

Halloween (Ebiro 31 by’Okw’Ikumi). Ekitabo ekirikwetwa The Encyclopedia Americana nikigira kiti: “Ebirikukorwa omu migyenzo erikubaho ebiro 31 by’Okw’Ikumi nibishangwa omu mikoro y’abanyamurwa b’abantu abarikwetwa Celts [abantu b’omuri Scotland aba ira] Obukristaayo butakabaireho. Abantu aba abarikwetwa Celts bakaba bagira obugyenyi bwa baaruhanga baabo babiri abakuru—ruhanga kazooba na ruhanga w’abafu. Obugyenyi obwa ruhanga w’abafu bukaba bubaho 1 Okw’Ikumi na Kumwe, aha kutandika kw’Omwaka Musya gw’Aba Celt. Emigyenzo eyaabaire ekorerwa abafu mporampora ekaikirizibwa omu migyenzo y’Ekikristaayo.”

Ebindi Biro Bikuru. Titurikubaasa kugamba aha mikoro y’okukuza ebiro bikuru yoona erikukorwa omu nsi. Beitu nabwo, ebiro bikuru ebirikukuzibwa kuhaisa abantu nari ebibiina by’abantu ekitiinisa tibirikwikirizibwa Yehova. (Yeremia 17:5-7; Ebyakozirwe 10:25, 26) Kandi guma noijuka ngu obukomooko bw’emikoro y’okukuza ebiro bikuru nibworeka yaaba nibishemeza Ruhanga nari bitarikumushemeza. (Isaaya 52:11; Okushuuruurwa 18:4) Emisingye y’omuri Baibuli erikugambwaho omu Shuura ya 16 ey’ekitabo eki neija kukuhwera kumanya oku Ruhanga arikutwara okwejwanzya omu mikoro y’okukuza ebiro bikuru n’obu byakuba bitari by’ediini.