DIANAN di fiesta popular religioso i no-religioso ku hende ta selebrá den hopi parti di mundu awe, no a originá for di Beibel. Kiko anto ta orígen di e selebrashonnan ei? Si bo tin e posibilidat di hasi investigashon den un biblioteka, lo bo haña interesante pa tuma nota di loke bukinan di referensia ta bisa tokante dianan di fiesta ku ta popular kaminda bo ta biba. Konsiderá un par di ehèmpel.

 Pasku di Resurekshon.  “No tin ningun indikashon di e selebrashon di e fiesta di Pasku di Resurekshon den e Tèstamènt Nobo,” segun The Encyclopædia Britannica. Kon Pasku di Resurekshon a kuminsá? Su rais ta bin di adorashon pagano. Ounke e dia di fiesta aki ta supuestamente pa konmemorá e resurekshon di Hesus, e kustumbernan konektá ku e temporada di Pasku di Resurekshon no ta kristian. Por ehèmpel, pa loke ta “e konènchi di Pasku,” The Catholic Encyclopedia ta bisa: “E konènchi ta un símbolo pagano i semper tabata un símbolo di fertilidat.”

Selebrashon di Aña Nobo. E fecha i kustumbernan konektá ku selebrashon di Aña Nobo ta varia di pais pa pais. Relashoná ku e orígen di e selebrashon aki, The World Book Encyclopedia ta deklará: “E gobernante romano Julio Cesar a establesé 1 di yanüari komo Dia di Aña Nobo na aña 46 P.K. E romanonan a dediká e dia aki na Janus, e dios di entrada, porta i tur komienso. Luna di yanüari a haña su nòmber for di Janus, kende tabatin dos kara, unu ku ta wak dilanti i e otro ku ta wak patras.” Pues selebrashonnan di Aña Nobo ta fundá riba tradishonnan pagano.

Halloween. The Encyclopedia Americana ta bisa: “Elementonan di e kustumbernan konektá ku Halloween por ser hañá bèk den un seremonia druida [un saserdosio kéltiko di antigwedat] di tempu pre-kristian. E keltanan tabatin fiesta pa dos dios prinsipal, dios di solo i dios di e defuntunan . . . , kende su fiesta nan a tene dia 1 di novèmber, ku ta komienso di e Aña Nobo kéltiko. E fiesta di e defuntunan a keda inkorporá gradualmente den e ritual kristian.”

Otro Dianan di Fiesta.  No ta posibel pa trata tur e konmemorashonnan ku hende ta tene rònt mundu. Sin embargo, dianan di fiesta ku ta halsa hende òf organisashonnan humano no ta aseptabel pa Yehova. (Jeremias 17:5-7; Echonan 10:25, 26) Kòrda tambe ku e orígen di selebrashonnan religioso ta determiná si nan ta agradá Dios òf nò. (Isaias 52:11; Revelashon 18:4) E prinsipionan bíbliko menshoná den Kapítulo 16 di e buki aki lo yuda bo determiná kon Dios ta mira partisipashon den dianan di fiesta ku ta di karakter no-religioso.