STAKA samting wea pipol celebratem long plande ples long world hem no kam from Bible. So hao nao olketa celebration olsem hem start? Sapos iu savve go long wanfala library, bae iu interest for savve long wanem olketa reference buk talem abaotem olketa samting wea pipol celebratem long kantri bilong iu. Tingim tufala example.

Easter. The Encyclopædia Britannica hem sei: “No eniwea insaed New Testament pipol celebratem datfala Easter festival.” Hao nao Easter hem start? Hem kam from worship bilong olketa heathen. Olketa sei diswan hem for celebratem resurrection bilong Jesus, bat olketa samting wea join witim Easter hem no Christian.

New Year Celebration. Plande kantri no semsem saed long date wea olketa markem for celebratem New Year, and hao for celebratem datwan. The World Book Encyclopedia sei olsem abaotem hao disfala celebration hem start: “Datfala ruler bilong Rome, Julius Caesar, markem January 1, 46 B.C., olsem first day bilong New Year. Olketa bilong Rome dedicatem disfala day long Janus, wea hem nao god bilong olketa gate, door, and start bilong samting. Olketa nemim January followim Janus, wea garem tufala feis—wanfala hem luk go long front and narawan luk go bihaen.” So olketa celebration for New Year hem kam from olketa heathen kastom.

Olketa Nara Celebration. Iumi kanduit storyim evri celebration wea pipol long world duim. Nomata olsem, Jehovah no acceptim olketa celebration wea apim olketa man, or wea apim olketa organization bilong man. (Jeremiah 17:5-7; Acts 10:25, 26) No forgetim tu hao samting wea mekem God hapi witim olketa celebration bilong religion or nomoa, hem hao olketa celebration hia hem start long firstaem. (Isaiah 52:11; Revelation 18:4) Olketa Bible principle long Chapter 16 bilong disfala buk bae helpem iu for savve long tingting bilong God abaotem wei for join insaed olketa celebration bilong world.