KASARAWIEN soangen rahn akan me aramas tohto nan sampah kin wia nan rahn pwukat sohte poahsoankihda Paipel. Ia wasa soangen kasarawi pwukat kin tepisang ie? Ma mie library nan omw wasa, ke pahn kak diar dahme pwuhk pwukat kin koasoiahki duwen kasarawien rahn akan me aramas kin kalapw wia nan wasa me ke kin kousoan ie. Tehk ekei rahn akan me aramas kin kasarawi.

Easter. Ehu dikseneri koasoia: “Kadehde Kapw sohte kin kasalehda me mie me kin kasarawi Easter.” (The Encyclopædia  Britannica) Ia wasa Easter tepisang ie? Met tepisang kaudok likamw. Aramas akan kin nda me re kin kasarawi iasadahn Sises. Ahpw tiahk kan me pidada Easter kaidehn tiahk en Kristian. Karasepe, me pid “kutohr en Easter,” ehu dikseneri en Kadolik koasoia: “Kutohr kin wia kilel en kaparaparalahn mour.”​—The Catholic Encyclopedia.

Kasarawi Parakapw. Rahno oh tiahk kan me pidada kasarawi en Parakapw kin wekpeseng nan sahpw akan. Me pid ia wasa kasarawi wet tepisang ie, ehu dikseneri koasoia: “Nan pahr 46 Mwohn Krais, Kaunen Rom me ede Julius Caesar koasoanehdi January 1 en wia rahn en Parakapw. Mehn Rom kan pilada rahno ong Janus, koht en ewen kehl kan, wenihmw kan, oh koht en tepin mehkoaros. Eden sounpwong en January kohsang Janus, me mie mese riau, ehu kin uhla mwowe oh ehu uhla mwuri.” (The World Book Encyclopedia) Kahrehda kasarawi en Parakapw kin poahsoanda pohn tiahk en kaudok likamw.

Halloween. Ehu dikseneri koasoia: “Tiahk kan me kin wiawi ni ahnsoun Halloween kohsang kasarawi en Druid [pwihn en samworo en mehn Celt en mahs] me kin wiawi mwohn ahnsoun Kristian akan. Irail mehn Celt kan kin wia kasarawi ong arail koht riemen, koht en ketipin oh koht en me melahr akan . . . oh kasarawi en koht en me melahr akan kin wiawi ni November 1, me iei Parakapw en mehn Celt kan. Kasarawi wet ong me melahr ekisekis wiahla tiahk en Kristian ehu.”​—The Encyclopedia Americana.

Kasarawien Rahn Teikan. Kitail sohte kak koasoiahda soangen kasarawi kan koaros me kin wiawi nan sampah pwon. Ahpw Siohwa sohte kin ketin kupwurki kasarawien rahn akan me kin kawauwih aramas akan de pwihn en aramas akan. (Seremaia 17:5-7; Wiewia 10:25, 26) Pil tamataman me wasa me kasarawi kan kin tepisang ie pil pahn kin kasalehda ma Koht kin ketin kupwurperenki de soh. (Aiseia 52:11; Kaudiahl 18:4) Kaweid kan oh ire mehlel kan en Paipel me kohda nan Irelaud 16 en pwuhk wet pahn sewese iuk en wehwehkihda ia sapwellimen Koht madamadau ong en iang kasarawi kan me sohte pidada pelien lamalam.