KARE te Pipiria ko te tumu ia o te au orote matauia i te pae o te akonoanga e te mea noa ua nei te akonoia ra i te au ngai e manganui o teianei ao i teia tuatau. Eaa, i reira, te akamata anga o taua au akono anga orote? Me ka rauka ia koe i te kimikimi i roto i tetai ngai vairanga puka, e mea meitaki kia kite koe eaa ta te au  puka tata e karanga ra no runga i te au orote te matauia ra i toou ngai e noo ra. Ka akara ana i etai au akaraanga ua.

Easter. “Kare e akakite anga o te akono anga i te tamataora anga Easter i roto i te Koreromotu Ou,” i akakite ei The Encyclopædia Britannica. Akapeea te Easter i te akamata anga? Kua akatumuia te reira ki runga i te akamori anga peikani. Koi tamanakoia ai teia orote ei akamaara anga i te tuakaouanga o Iesu, te au peu tei piri atu ki te atianga Easter kare ia i te mea Kerititiano. Ei akatau anga, no runga i te “rapiti Easter” tei matauia, te karanga ra The Catholic Encyclopedia e: “Te rapiti e akatutu anga peikani ia e kua riro ua ana ia ei oroa o te tu anaunau.”

Tamataora Anga Mataiti Ou. Te ra e te au peu tei piri atu ki te akono anga Mataiti Ou e tuke ia mei tetai enua ki tetai. No runga i te akamata anga o teia akono anga, te akakite ra The World Book Encyclopedia e: “Kua akatumu te tutara Roma a Kaisara Iulio ia Tianuare 1 ei Ra Mataiti Ou i te 46 M.T. Kua akatapu te au Roma i teia ra kia Janus, te atua o te au aua, te au ngutupa, e te au akamataanga. Te marama o Tianuare kua tapaia te ingoa ki runga ia Janus, koia oki e rua ona tutu mata​—okotai e akara ra ki mua e tetai e akara ra ki muri.” No reira kua akatumuia te au akono anga Mataiti Ou ki runga i te au peu tupuna peikani.

Halloween. Te karanga ra The Encyclopedia Americana e: “Te au tu o te au peu tei piri atu ki te Halloween kua kitea mai e no ko mai i tetai tamataora anga Druid [akatereanga taunga Celtic taito] i mua ake i te au tuatau Kerititiano. E au tamataora anga na te au tangata Celt no nga atua maata e rua​—e atua no te ra e te atua no tei mate ra . . . , tei raveia ra te tamataora anga i roto ia Noema 1, te akamataanga o te Mataiti Ou a te au tangata Celt. Te tamataora anga o tei mate ra kua akamata marie te reira i te tukuia ki roto i te peu Kerititiano.”

Tetai Atu Au Orote. Kare e rauka i te uriuri i te au akono anga katoatoa te raveia ra i teianei ao. Inara, te au orote te akateitei ra i te au tangata me kore te au akaaerenga tangata kare ia e arikiia e Iehova. (Ieremia 17:​5-7; Angaanga 10:​25, 26) E akamanako katoa, rai, i te akamata anga o te au tamataora anga akonoanga e me te mareka maira te Atua ia ratou e me kare. (Isaia 52:11; Apokalupo 18:4) Te au kaveinga Pipiria e taikuia ra i te Pene 16 o teia puka ka tauturu ia koe kia akataka e eaa to te Atua manako no runga i te piri anga ki roto i te au orote kare na te akonoanga nei.