TSY mioregne agnate Baiboly ao ty fetem-pivavahagne naho ty fete ila’e maro tea amy ty tane maro. Boake aia ty niatomboha o fete rehoe? Naho mikodebe amy ty fagnajariam-boke agne rehe, le ho teà’o ty hagnente ty raha rehafe ty boke ila’e miomba ty fete maro tea amy ty tanàgne misy azo. Intoagne misy ohatse tsiampe.

 Paka. “Tsy mirehake miomba ty fankalazagne Paka ty Tesitamenta Vaovao”, hoe ty boke Fangalan-kilala Britannica. Akore ty niatomboha o fete iohoe? Boake amy ty mpanao masimasy o fete iohoe. Nao zao fankalazagne ty date niveloma i Jesosy o fete iohoe, faie ndra mifanipake amy ty fampianaragne kirisitianagne ty fombafomba maro anoegne ama’e. Hoe ty Fangalan-kilala Katolika (angilé) miomba ty bitro ampiasaegne naho fa Paka: “Famantaragne mampiambake ty mpanao masimasy o bitrò, sady famantaragne ty haterake maro.”

Taom-baovao. Sambe managne ty date naho ty fankalazagne Taom-baovao’e ze kila tane. Izao ty rehafe ty Fangalan-kilala ty Tontolo Toy, miomba ty niatomboha o fete iohoe: “Ty 1 Zavié ro natao i Jules César, mpitondra romana ho Taom-baovao tamy ty taogne 46 T.K. I Janus andrianagnahare ty lalambey naho ty lalagne vaho ho fiatombohan-draha, ty nanoa o Romanao o andro iohoe. Roe ty tarehe i Janus, ty raike nitolike magnaloha, ty raike nitolike magnafara.” Izay ty magnamaregne fa boake amy ty fombafomba ty mpanao masimasy ty fankalazagne Taom-baovao.

Halloween. Hoe ty Fangalan-kilala Amerikana miomba o fete hambagne amy ty fete ty mate iohoe: “Fitrea tamy ty fete nanoe ty [mpisorogne Selita] taloha ty andro kirisitianagne ty fombafomba ila’e orihegne amy ty Halloween. Nanao fete hoahy ty andrianagnahare roe lahibey iareo. Ty raike hoahy ty andrianagnahare ty masoandro, le ty raike hoahy ty andrianagnahare ty mate ..., le nankalazaegne amy ty 1 Novambera, ty fiatomboha ty Taom-baovao Selita. Nazilike ho agnisa ty fomba Kirisitianagne o fete ty mate iohoe naho fa takaelà’e atoy.”

Fete hafa. Tsy ho azo tognogne eto iaby ze karazam-pete amy ty tane toy. Faie heje i Jehovah ty fete natao hagnomeagne engegne ndaty ndra ty fikambanagne naore o ndaty. (Jeremia 17:5-7; Asan’ny Apostoly 10:25, 26) Ko haligno fa miankigne amy ty niatomboha ty fetem-pivavahagne raike ty mahavy aze ho teàn’Andrianagnahare ndra ho heje’e. (Isaia 52:11; Apokalypsy 18:4) Misy fanoroagne mioregne agnate Baiboly ao ty Toko faha-16 amy ty boke toy, sady magnampe azo hamantatse ty fivazohoan’Andrianagnahare ty fandrambesagne anjara amy ty fetem-pivavahagne.