BAIBULI teri ndugirro y’ebiro by’amadiini n’ebiro ebindi ebikuzibwa mu bicweka by’ensi bingi biro binu. Hati ebiro ebyo bikaruga nkaha? Kakusangwa oseruliriza omu byahu’ro by’ebitabu, noija kumanya ebitabu ekibibaza ha biro bikuru  ebikuzibwa omu kiikaro nambere oikara. Wetegereze eby’okurorraho binu.

Ppasika. Ekitabu ekyetwa The Encyclopædia Britannica. Kigamba ngu “Omu Kiragano Ekihyaka busamu aholeka ngu Ppasika yakuzibwaga.” Hati Ppasika ekatandika eta? Ekaruga omu kuramya okw’ekikafiiri. Nobubaraba bagamba ngu ha kiro ekyo baba nibaijuka okuhumbuka kwa Yesu, obuzizozizo obukorwa ha kujaguza okwo tibuli bw’Ekikristayo.

Kukuza Omwaka Omuhyaka. Ekiro n’obuzizozizo obukwata ha kukuza omwaka omuhyaka byahukana mu buli nsi. Ekitabu The World Book Encyclopedia kigamba kiti ha ndugirro y’okukuza ekiro kinu: “Omulemi Omurumi Julius Caesar akakoma January 1 nk’Ekiro ky’Omwaka Omuhyaka omu 46 B.C.E. Abarumi ekiro kinu bakakikomayo okuramya Janus, ruhanga w’enyigi n’entandikwa. Okwezi kwa Januali kukahebwa ibaara eryo kuruga hali Janus, akaba aina obuso bw’emirundi ebiri—obumu butunulire enyuma n’obundi omu maiso.” Nahabwekyo okukuza omwaka omuhyaka kukarugi’ra omu mikoro y’ekikafiiri.

Halloween. Ekitabu The Encyclopedia Americana kigamba: “Obuzizozizo bw’omukoro gunu bukaruga hali ba nyakatagara ba Buhindi n’omu Bulaya, Obukristayo butakabaireho. Abantu b’omu bicweka ebyo babaga n’obugenyi bwa ba ruhanga baabu babiri abakuru—ruhanga ow’izooba na ruhanga w’abafu, obugenyi bunu babucumbaga Novemba 1, ekiro ekyatandikaga omwaka omuhyaka omu kicweka ekyo. Mpora mpora Abakristayo bakatandika kukuza omukoro gunu.”

Ebiro ebikuru ebindi. Tikikusoboka kumarayo ebiro byoona ebikuzibwa okwehinguliriza ensi yoona. Kyonka ebiro bikuru ebirukuhaisaniza abantu rundi ebitebe by’abantu tibisiimwa omu maiso ga Yahwe. (Yeremiya 17:5-7; Engeso 10:25, 26) Kandi nabwo kijuke ngu endugirro y’ebiro by’ediini ebikuzibwa ekutukonyera kwetegereza obu biraba biikirizibwa omu maiso ga Ruhanga rundi nangwa. (Isaya 52:11; Okusuku’rwa 18:4) Emitindo ya Baibuli ebazibwaho omu Suura 16 ey’ekitabu kinu nija kukukonyera kumanya omulingo Ruhanga ogu atwaramu abo abakuza mikoro endi etali y’ediini.