E SE māfua mai i te Tusi Tapu a aso malōlō lauiloa a lotu mo fenua i te lasiga o koga i te lalolagi nei. Se a la te māfuaga o vaegā fakamanatuga penā? Kafai e mafai o tai sukesuke ‵loto atu koe, ka mafai o lavea atu ne koe a mea kolā e fakaasi mai i tusi e uiga ki aso malōlō kolā e lauiloa i tou fenua. Mafaufau ki nisi fakaakoakoga konei.

Eseta. E fai mai te Encyclopædia Britannica, penei: “E seai eiloa  se fakaasiga e uiga ki te fakamanatuga o te Eseta i te Feagaiga Fou.” Ne kamata mai pefea te Eseta? Ne māfua mai i tapuakiga fāpaupau. E tiga eiloa e fai mai me i te aso malōlō tenei ko te fakamanatuga o te toetuga o Iesu, a faifaiga kolā e aofia i te vaitaimi o te Eseta e se ne faifaiga Kelisiano. E pelā mo te “Tamā lapiti o te Eseta” (Easter bunny) e fai mai The Catholic Encyclopedia, penei: “A te lapiti se fakailoga fāpaupau telā ne fakauiga faeloa ki te fanafanau malosi o tino.”

Te Fakamanatuga o te Tausaga Fou. E kese‵kese a te po o te masina mo faifaiga kolā e aofia i te fakamanatuga o te Tausaga Fou i fenua katoa. E fai mai penei The World Book Encyclopedia e uiga ki te māfuaga o te fakamanatuga tenei: “Ne ‵fuli ne te pule Loma ko Iuliano Kaisala a te po 1 o Ianuali ki te fakamanatuga o te Tausaga Fou i te 46 T.A. Ne fai ne te kau Loma te aso tenei mo fai se aso o Ianu, te atua o ‵pui, mataloa, mo kamataga. Ne māfua mai te igoa o te masina ko Ianuali i a Ianu, ko te tino telā e lua ana mata—e tasi tena mata ne fakasaga ki mua kae ko te suā mata ne fakasaga ki tua.” Tela la, e maua atu foki te fakamanatuga o te Tausaga Fou i faifaiga fāpaupau.

Halloween. E fai mai The Encyclopedia Americana, penei: “Ne māfua mai nisi faifaiga o te Halloween (Aloini) i se sauniga a te kau Druid [ne faitaulaga o te kau Palagi (Celts) i aso mua] a koi tuai o oko mai te Lotu Kelisiano. Ne fai sāle ne tino konā (Celts) a ‵kaiga fakafiafia mō te avā atua tāua—te atua o te la mo te atua o tino ‵mate . . . , kae ne fai tena ‵kaiga fakafiafia i te po 1 o Novema, ko te kamataga o te Tausaga Fou a te kau Palagi mua. Fakamuli ifo, ne gasolo malie eiloa o talia te ‵kaiga fakafiafia tenā mō tino ‵mate ki loto i sauniga a te kau Kelisiano.”

Nisi Aso Malō‵lō. E se mafai o fakamatala atu a aso malōlō katoa kolā e fakamanatu i te lalolagi kātoa. Kae e se talia eiloa ne Ieova a aso malōlō kolā e fakamaluga aka ei a tino io me ko fakapotopotoga a tino. (Ielemia 17:5-7; Galuega 10:25, 26) Masaua la, me e faka‵na eiloa te talia mo te sē talia ne te Atua o se fakamanatuga masani fakalotu ki te māfuaga o te mea tenā. (Isaia 52:11; Fakaasiga 18:4) A akoakoga i te Tusi Tapu kolā e taku mai i te Mataupu e 16 o te tusi tenei ka fesoasoani atu ke iloa ne koe te kilokiloga a te Atua, me e ‵tau o kau atu koe ki aso malōlō i tou fenua io me ikai.