NKAMAROZANY fety ataonolo tsy baka amy Baiboly. Baka aia fo naviany fety aby io? Izikoa anao mandeha amy tany fikajian̈a boky, anao mety mizaha fan̈azavan̈a maro momba fety fataonolo amy tany misy anao. Atsika hizaha sasany amy zen̈y.

Paka. Boky Rakipahaizan̈a Britannica mivolan̈a karaha ty: “Testamenta Vaovao tsy mikoran̈a momba  Paka io.” Baka taia fo naviany fetiny Paka io? Izio baka aminolo panompo sampy taloha tan̈y. Misy olo mivolan̈a fa Paka io fahatsiarovan̈a nitsanganany Jesosy tamy maty, kanefa fomba jiaby ataonolo aminandra io tsy fan̈araka amy Baiboly. Karaha ty nambarany Rakipahaizan̈a Katolika (angiley) momba “bitrony Paka”: “Bitro io ahaizan̈a panompo sampy, baka io izio koa ivolan̈ana fitirahan̈a maro.”

Taombaovao. Tsy mira datiny Taombaovao ndreky fomba atao aminandra io arakaraka tany. Karaha ty volan̈iny Rakipahaizan̈a Zao Tontolo Zao: “Tamy taon̈o 46 T.K., Jules César pitondra romanin̈y nan̈iraka olonany han̈ano Taombaovao isaka 1 Zanvie. Taminandra io, iro nahatsiaro Janus, zan̈ahariny varavaran̈a maventy ndreky hely ndreky fanombohandraha. Baka taminy an̈aran̈a Janus io naviany fanjava Zanvie. Janus io nisy sora aroe, araiky nitodiky aloha, araiky nitodiky afara.” Hitantsika baka amy zen̈y fa baka amy panompo sampy fety io ndreky fomba jiaby fatao aminandra io.

Saint-Valentin. Karaha ty koran̈iny Rakipahaizan̈a Zao Tontolo Zao: ‘Datiny Saint-Valentin io mifanojy aminandra fahatsiarovan̈a Kristianin̈y aroe naty maritiora. Valentin an̈arandro. Fomba jiaby ataonolo aminandra io mira raha fataonolo isaka fety romanin̈y taloha tan̈y, Lupercale an̈arany. Isaka 15 Fevrie iro man̈ano izio. Isaka fety io koa iro nan̈ano fetiny Junon, zan̈ahariny man̈angy ndreky vadian̈a, ndreky Pan, zan̈ahariny natiora.’—(1973), Boky Faha-20, p. 204

Fety hafa. Tsy ho voakoran̈a ato aby karazan̈a fety jiaby misy ambony tany ty. Kanefa, izikoa fety araiky natao an̈amezan̈a voninahitry olo na fikamban̈ana naorin̈inolo, Zan̈ahary tsy tia zen̈y. (Jeremia 17:5-7; Asan’ny Apostoly 10:25, 26) Dikanizen̈y, arakaraka fomba nanombohany fety araiky mahavy izio tiany Zan̈ahary na halany. (Isaia 52:11; Apokalypsy 18:4) Ho hitanao amy Toko faha-16 amy boky ty toro lalan̈a baka amy Baiboly, ahaizanao fety tiany Zan̈ahary ndreky fety halany.